Díli, loron quarta 31 Agosto 2022, Konsellu Administrasaun  EDTL, E.P. halo enkontru ordinaria iha sala enkontru iha Kaikoli.

Iha reuniaun ordinária ida ne’e diretora Finansas no Komersiu apresenta bá membru Konsellu Administrasaun atualizasaun cashflow orsamentu EDTL E.P. nomós atualiza kona-ba Reseitas bá fulan Jullu nian.  Diretór Planeamentu de Sistema Elétriku, Sr. José Fernandes, M.Ec.Dev apresenta proposta kona-ba implementasaun projetu programa eletrifikasaun nasional (PEN) ba suku tolu (3) Fatumean (Covalima), Fatucalo (Manufahi) no Fatumakerek (Manatuto) ne’ebé hanesan suku ikus bá planu ba programa refere. Nomós iha biban ne’e Diretór apresenta proposta bá mudansa projetu PEN iha suku Urahou – Hatolia ne’ebe ekipa tékniku sira ba halo reverifikasaun ba implementasaun ne’ebé halao tia ona iha tinan 2016.

Presidente CA DR. Paulo da Silva, aprezenta proposta husi Komisaun Ezekutiva kona-ba politika Projetu Komunitáriu bá aldeia sira ne’ebé seidauk asesu enerjia elétrika no ho distansia ne’ebé kiik (1 – 2 km) atu nune’e bele kontribui hodi aselera implementasaun programa eletrifikasaun iha Timor laran tomak. Alende ne’e Komisáriu Ezekutivu Servisu Tékniku Eng. Latino Jerónimo apresenta mos konaba mudansa ba kapasidade transformador ba sub stasaun Camea husi 63 MVA ba 40 MVA tamba transformador ho kapasidade 63 MVA nia todan 83 toneladas nune’e labele akomoda iha Porto Dili no mos difisil atu halo mobilizasaun tan trailer iha Dili so bele tula ho todan maximu 45 toneladas. Iha tempu hanesan  Diretór Rede Transmissaun, Eng. Egídio N. S. Soares, atualiza ba situasaun entre torre N71 no N72 seksaun Cassa – Suai ne’ebé agora dadaun fo ameasa bo’ot bá movimentasaun veikulu sira ne’ebe mak ultrapasa iha estrada refere tamba inklinasaun kabu husi konduktor ba iha rai-leten (estrada) 6.2 metro deit, distansia refere la tuir padraun.