Díli, 24 Novembru 2022, Membru Konsellu Administrasaun (CA) hala’o enkontru ordinária iha sala reuniaun EDTL,E.P Kaikoli-Díli, Kinta semana ne’e. Durante enkontru Presidente Konsellu Administrasaun EDTL,E.P Dr. Paulo da Silva introduz Sr. António Pedro Belo nu’udar membru Konsellu Administrasaun foun hanesan haktuir Despacho Nº 174/MOP/2022 de 8 de Novembro, publikadu iha jornal repúblika loron 11 novembru 2022.

 

Iha biban ne’e mós Sr. António agradese bá konfiansa no komprometidu sei koopera hodi apoiu atividade jerensiál empreza nian, nune’e melhora liu-tan servisu iha Konsellu Administrasaun.

Enkuantu Diretóra Finansa no Komersiál Sra. Idrisiyah Sagran apresenta progresu ezekusaun orsamentu no reseita ne’ebé EDTL,E.P rekolla iha tinan ne’e hamutuk Dólar Amerikanu milaun $ 39.6 husi períodu fulan Janeiru to’o fulan Outubru.

 

Presidente CA hamutuk ho membru sira deskute kona-ba planu dezenvolvimentu Solar PV iha Munisipiu Ataúro no atualiza progressu estudu viabilidade Solar PV iha Manatuto, ne’ebé hala’o husi Kompaña Entura, iha ona faze finalizasaun. Entretantu lidér máximu EDTL,E.P ne’e husu atensaun ba parte Finansas no Komersiál hodi halo kontrolu rigorozu ba reseita husi Pos-pagu, Pré-pagu, Nova-ligasaun enerjia, nune’e mós operadór sira ne’ebé aluga poste.

 

Diretór Rede Transmisaun Eng. Egídio Soares, Atualiza ezekusaun kontratu overhead line 20kV Liquiça–Tibar no upgrade 150kV transformador iha Sub-estasaun Liquiça, ne’ebé implementa husi kompaña China Shandong International Economic and Technical Cooperation Group, Ltd (CSI) finansia husi Fundu Infrastrutura (FI) dadaun ne’e ho progresu total 38,08%, progresu overhead line 20kV Liquiça – Tibar nian ho 37,94% no bá upgrade 150kV transformador iha Sub-estasaun Liquiça 0,14%.

Haree ba progresu ezekusaun kontratu iha leten, Membru Konsellu Administrasaun orienta kedas Diretór Rede Transmisaun hodi atualiza relatóriu ba SE Ministru Obras Públika Abel Pires da Silva atu toma konsiderasaun bá projetu ne’ebé laiha progresu.

Última ajenda, Komisáriu Servisu Tékniku, Eng. Latino Jerónimo atualiza progresu ezekusaun fornesimentu no instalasaun 40 MVA iha Sub-estasaun Camea.

 

Média, EDTL,E.P