Dili, 04 Novembru 2022: EDTL,E.P halo lansamentu ba Sistema Finance Management System (FMS) - Enterprise Resource Planning (ERP), ne'ebe dezemvolve husi Ekipa Operadora Telekomunikasaun TELEMOR-Viettel Groups, hafoin manan konkursu ne'ebe EDTL,E.P loke. Sistema FMS-ERP SAP Business One hanesan sistema integradu ida ne'ebe ho nia funsaun, inkorpora modulu asesidu ba kliente sira, hodi jere no halo kontrolu operasaun empreza komersial nian, ho objetivu automatiza funsaun negosiu xave finansiais, operasaun no rekursu umanu.

ERP sei apoiu jerente EDTL,E.P hodi foti desizaun rapida kona-ba plataforma de dadus sentralizadu no sei optimiza funsionamentu servisu korporativu.

Iha diskursu Prezidente Komisaun Ezekutiva EDTL,E.P Dr. Paulo da Silva hatete Lansamentu ba sistema foun ne'e fasilita liu-tan servisu korporativu nian ho efisiensia, nune'e bele atinje objetivu ne'ebe ita hakarak. "Sistema ne'e liga ba servisu finansas, pedidu sira kona-ba prosesu aprovizionamentu, prosesu pagamentu no jestaun patrimoniu empreza nian inklui ba rekursu umanu, tanba ne'e sistema integradu ne'ebe utiliza atu jere funsionamentu servisu korporativus.

Alende ne'e, Diretor Jeral Telemor-Viettel Groups, Sr. Tran Van Bang ne'ebe dezemvolve Sistema  ne'e hatete "Finance Management System (FMS) - Enterprise Resource Planning (ERP) sei lori mudansa signifikativu iha revolusaun digital EDTL,E.P nian".

Partisipa iha seremonia lansamentu ne'e, Prezidente Komisaun Ezekutiva EDTL,E.P Dr. Paulo da Silva, Prezidente ANAS.I.P Sr. Domingos Pinto, Komisariu Ezekutiva Servisu Korporativu, Sr. Humbertu Pereira, Prezidente Konsellu Fiskal EDTL,E.P Sr. Joao Amaral, Vogais no Diretores EDTL,E.P, Reprezentante MOP nomos Ekipa Operador Telekomunikasaun TELEMOR-Viettel Groups.

Media, EDTL,E.P