Iha intervensaun Komisáriu Ezekutivu Servisu Tékniku EDTL, E.P. Eng. Latino Jerónimo hato'o parabéns ba komunidade ne’ebè mak hetan asesu ba eletrisidade tamba finalmente ita bo’ot sira hetan. Komisáriu mòs informa katak dezenvolvimentu tenki lao, husi setór eletrisidade dezenvolvimentu tenki lao husi kapitàl munisìpiu mak bà aldeia sira ho razaun tamba ita iha sentral elétrika rua Hera no Betano nune’e tenki dada uluk husi kapital munisìpiu wainhira eletrifika tia se lori ba postu administrativu no se lori ba suku sira ne’ebè mak asesu ba estrada depois se to’o ba aldeia sira, tan difikuldade ba mobilizasaun material.

Ho tempu sira ne’ebe mak lao hamosu injustisa maibè lalaok mak ida ne’e. Wainhira VIII Governo transforma Diresaun Geral de Eletricidade ba Empresa Públika (EDTL, E.P.) ho misaun no visaun mak lori ahi bà ema hotu-hotu nia uma, no felizmente ohin loron to’o komunidade ne’e. Parabéns ba komunidade no autoridade tomak tamba EDTL la rona iha impedimentu durante implementasaun obra ne’e, prosesu ne’e lao ho diak. Eng. Latino Jerónimo hateten mós katak nia sente kontente wanhira hare ba inan aman sira nia ksolok hodi bele asesu ba enerjia elétrika. Husu atu aproveita ho diak no hato’o mos apresiasaun ba autoridade sira hanesan Sr. Administrador ho nia estrutura no Sr. Komadante do Munisípiu ba apoiu durante ne’e hodi labele hetan impedimentu. Mensagem ikus Komisáriu Servisu Tékniku EDTL, E.P. husu ba komunidade sira karik iha avaria ruma husu atu komunika ba tékniku husi munisípiu hodi bele atende ba avaria refere. Nomos husu atu bele kontribui ho kuidadu ho didiak no kopera diak wanhira instala kontador ba uma kain sira, hodi kontribui mós.

Responde ba preokupasaun ne’ebe mak Nai Xefe de suku hato’o katak falta aldeia tolu mak sedauk asesu ba eletrisidade, nune’e Eng. Latino Jerónimo hateten katak EDTL iha politika ida mak hanesan Projetu Eletrifikasaun Komunitária ne’ebe EDTL se servisu hamutuk ho komunidade hodi aselera insalasaun eletrisidade bá sira nia aldeia rasik.

Iha biban ne’e Sr. Komisáriu mós partilla konaba atinjimentu projetu eletrifikasaun ne’ebe mak durante EDTL, E.P. a nível suku iha teritóriu tomak EDTL promove projetu hodi kobre suku hirak ne’ebe sedauk asesu ba projetu ne’e EDTL loke konkursu tomak, halo esforsu hotu no maioria parte konklui ona, to'o fim dezembru a nivel suku 91% assesu enerjia elétrika, hela 9% EDTL koko konklui iha primeiru trimestre iha tinan 2023.