Tutuluo, 21 Dezembru 2022: Vise-prezidente EDTL,E.P Sr. Humberto Pereira hamutuk ho autóridade lideransa komunitária no komunidade sira kuarta-feira (21/12/2022), ofisialmente halakan ona enérjia eletrisidade ba komunidade uma ka'in 200 resin husi aldeia 3, iha suku Tutuluro, Postu-administrativu Same.

Xefi suku Tutuluro Sebastiao da Costa Hornai agradese ba oitávu governu konstitusionál ho nia esfórsu tomak hodi fornese enerjia eletrisidade ba komunidade suku Tutuluro, asesu ona enérjia eletrisidade. Komunidade Tutuluro sente kontenti maske óbra foin atinji purséntu hitunulu resin-lima maibe EDTL halakan ona eletrisidade ba komunidade sira hodi festeza loron natal no tina-foun.

Lideránsa komunitária ne'e preokupa, suku Tutuluro iha aldeia 7 maibé aldeia 3 maka hetan ona instalasun liña eletrisidade, maibé falta aldeia 4 maka seidauk asesu ba liña eletrisidade.

Hatan ba preokupasaun ne’e Vise-prezidenti Konsellu Administrasaun EDTL,E.P Sr. Humberto Pereira promete, aldeia 4 ne'ebé seidauk asesu ba liña eletrisidade, EDTL,E.P hatama ona iha planu liu-husi projetu eletrifikasaun komunitáriu.

‘’Instalasun liña eletrisidade ba aldeia 4, EDTL,E.P mós iha programa ida ho naran projétu eletrifikasaun komunitária, signifika EDTL,E.P ho komunidade maka servisu hamutuk hodi implementa projétu ne'e, ba komunidade sira ne'ebé ahi seidauk-lakan, lalika laran triste ita sei halo esfórsu atu ema hotu asesu ba eletrisidade’’.

Nia hatutan, ohin ita ofisializa halakan ona eletrisidade ba Aldeia 3 iha suku Tutuluro, durante fulan ne’en EDTL,E.P fo gratuita ba komunidade sira uza eletrisidade, hafoin ne’e tékniku EDTL sei mai sosializa hodi monta kontador prepagu hodi kontribui selu eletrisidade.

Media,EDTL,E.P