Lactos, 23 Dezembru 2022: Eletrisidade de Timor-Leste, Empresa Pública (EDTL,E.P) hamutuk ho ANE,I.P no autoridade local, sexta-feira ne’e, ofisialmente halakan eletrisidade ba komunidade uma-kain hamutuk 114 iha suku lactos, postu administrativu Fohorem, municípiu Covalima liu-husi programa eletrifikasaun nasionál pakote 34.

Xefi Suku Lactos, António Afonso hatete Maske durante implementasaun projetu eletrifikasaun iha Lactos hasoru dificuldades barak, maibe agradese ba kompaña no ekipa enjineru PMU EDTL nian ne’ebé esforsu  hodi halo kontrolu maka’as nune’e ohin-loron ami iha suku ida ne’e bele hetan naroman.

Alende ne’e Administrador Postu-Fohorem Carlos Carvalho de Araújo, husu governu liu-husi EDTL,E.P atu toma medidas ba Kompaña implementador projetu eletrifikasaun iha suku Lactos, tanba durante óbra ne’e lao kompaña refere ladun iha kooperasaun diak ho komunidade sira. Maske nune’e komunidade sira iha suku Lactos sente kontente tanba hetan ona naroman, tanba ne’e hodi komunidade sira nia naran hato’o agradesementu ba VIII governu ne’ebé lidera husi Jenerál Taur Matan Ruak tanba ho nia programa ohin liu-husi EDTL,E.P ofisialmente halakan eletrisidade iha suku ne’e.

Iha intervensaun Vise-prezidente EDTL,E.P Humberto Pereira hatete oitavu governu konstitusional ho nia programa eletrisidade ba komunidade, liu-husi empreza estatal EDTL sei distribui enerjia eletrika ba suku no aldeia sira ne’ebé seidauk asesu.

Iha biban ne’e mos Vise-prezidente apela ba kliente ka utilizador enerjia elétrika sira hotu, atu uza eletrisidade ho kuidadu, seguru no responsabilidade nune’e labele kauza vítima ne’ebé lakon vida tanba uza sala enerjia eletrika.

Implementasaun Projetu Eletrifikasaun Nasionál (PEN) pakote 34 iha suku Lactos ho distânsia liña media tensaun (MT) 4,65 kilómetru no liña baixa tensaun (BT) 5,2 kilómetru, óbra refere gasta orsamentu dolár amerikanu $ 257,709.75 no benifisia uma-kain 114. Enkuantu óbra ne’e implementa husi kompaña maun-alin Romsea Unip. Lda JV ho Hela-mula Unip. Lda.

Média, EDTL,E.P