Hafoin ofisializa fornesementu enerjia elétrika ba komunidade sira iha suku refere, Vise-prezidente EDTL,E.P Sr. Humberto Pereira husu ba komunidade sira atu uza eletrisidade ho kuidadu nune’e labele fo kauza ba ema nia vida.

‘’Ohin loron ita ofisializa halakan eletrisidade ba komunidade sira iha suku Mindelo, maibe nafatin fo atensaun ba imi tenke uza ho kuidadu no responsabilidade, tanba EDTL,E.P lakoi iha vítima ruma ne’ebé kauza husi uza sala enerjia elétrika’’.

Alende ne’e Sr. Humberto Pereira apela mos ba komunidade sira atu labele halo ligasaun arbiru sem akompaña husi tékniku sira husi EDTL''.

‘’Husu ba hau nia inan no aman sira karik atu halo ligasaun ruma favor kontaktu ba EDTL,E.P no labele halo ligasaun mesak, tanba neé perigu tebes’’.

Iha fatin hanesan Xefi Suku Mindelo Sr. Mateus da Silva sente kontenti tanba bele asesa ona enerjia elétrika maske suku Mindelo lokaliza iha área remotas.

‘’Durante ukun rasik-an tinan ruanulu resin ona ami iha suku ida ne’e laasesu eletrisidade, maibe ohin loron ami sente kontenti, maske ami hela iha área remotas maibe ami mos bele sente ona naroman’’.

Suku Mindelo kompostu husi Aldeia hat hanesan, Aldeia Maubise-ria, Osnako, Binani no Aidila, ho total abitante kuaze rihun ida.

Enkuantu implementasaun projetu eletrifikasaun nasionál pakote 34 iha suku refere, implementa husi kompaña Aitemalau-tarutu Unip Lda JV Delta-Mola Unip Lda.