Díli, 15 Dezembru 2022: Komisáriu Ezekutivu Servisu Korporativu EDTL, E.P Humbertu Pereira, partisipa iha seremónia asina akordu entre Governu Timor-Leste ho Governu Austrália ne'ebé reprezenta husi Ministru Finansas, Rui Gomes no Adjuntu Primeiru Sekretáriu, Divizaun Sudeste Aziátiku, Ridwaan Jadwat, Kinta-feira ne'e iha salaun nobre MNEC.

Akordu ne’e prevee kontribuisaun finanseira husi Governu Austrália ba Timor-Leste ho valór hamutuk millaun dolar amerikanu 28,36 no kontratasaun empréstimu ho valór dolar amerikanu millaun 45, ho períodu maturaridade tinan 25, hodi finansia projetu dezenvolvimentu Aeroportu Internasionál Prezidente Nicolau Lobato. 

Akordu Finansiamentu ho montante millaun $73,4 hodi finansia projetu dezenvolvimentu Aeroportu Internasionál Prezidente Nicolau Lobato hanesan, konstruisaun asesu estrada ba terminál pasajeirus, pakote kombate inséndiu, edifísiu kuarantena animal no planta, edifísiu ba kuidadus saúde primária, depózitu ba kombustível, eletrisidade no iluminasaun públiku, fasilidade bee mo’os, fatin estasionamentu karreta no motor inklui zona drop off terminál pasajeirus iha Aeroportu refere.

Aleinde ne’e, Governu Timor-Leste mós aloka orsamentu millaun $17,5 hodi finansia obra konstrusaun pista aterrajen, reasentamentu ba família sira ne’ebé mak hela besik Aeroportu no servisus konsultóriu supervizaun konstrusaun aeroportu.

Enkuantu Eletrisidade de Timor-Leste, Empreza Públika (EDTL, E.P) hasei responsabiliza fornesimentu eletrisidade no iluminasaun públiku ba Aeroportu Interniasional Nicolau Lobato - Díli.  

Partisipa iha seremónia ne'e Ministru Finansas Rui Gomes, Ministru Obras Públika Abel Pires, Ministra Negosiu Estranjeiru no Kooperasaun Adaljiza Magno, Adjuntu Primeiru Sekretáriu, Divizaun Sudeste Aziátiku, Ridwaan Jadwat, Komisáriu Ezekutivu Servisu Korporativu EDTL, E.P, Korpu Diplomata no reprezentantes husi instituisaun relevante sira.