Tibar, 30 Novembru 2022: Prezidente Komisaun Ezekutiva EDTL,E.P Dr. Paulo da Silva akompanha husi Komisáriu Ezekutivu Servisu Tékniku Eng. Latino Jerónimo no Diretór Rede Transmissão Eng. Egídio Soares, Kuarta-feira ne’e partisipa iha seremónia inagurasaun Portu de Baía Tibar, Liquica ne'ebe ofisialmente inaugura husi Sua Exelénsia Prezidente Repúblika Dr. José Ramos Horta ho Primeiru-Ministru Taur Matak Ruak akompaña husi Prezidente Parlamentu Nasional Aniceto L. Guterres Lopes, Sr. Laurent Palayer, CEO TimorPort S.A, Membru Governu Da-Ualu no Eis Titular sira.

 

Portu Baía Tibar hala’o ona atividade operasional hodi troka Portu Díli, nune’e fasilita movimentu importasaun no esportasaun sasán ho kapasidade karga kontentór hamutuk millaun ida kada tinan. Portu ne’e inklui ka’is ida ho bersus rua ne’ebé sei uza hodi redus atrazu iha libertasaun kontentór inklui kustu tranzasaun atu fasilita efisiénsia servisu alfandegáriu no atividade komérsiu.

 

Portu Baía Tibar foun no modernu ne’ebé sei fasilita Timor-Leste ninia konektividade marítima iha rejiaun Ázia, liga Timor-Leste ba merkadu komérsiu globál no hasa’e liután país ninia asesu komérsiu ba merkadória sira hanesan agrikultura, turizmu, peskas, pekuária nomós indústria sira seluk.

 

Konstrusaun Portu Baía Tibar ho modalidade Parseria Públiku-Privada (PPP, sigla Ingles) entre Governu Timor-Leste ne’ebé aloka millaun $130 iha Fundu Viabilidade (VGF, sigla Inglés) no Timor Port, subsidiáriu husi Bolloré ho millaun $150, hamutuk millaun $280 ba faze inísiu husi totál investimentu estimativu millaun $500 ba tinan 30.

 

Média, EDTL.E.P