Díli, 25 Janeiru 2023: Eletricidade de Timor-Leste, Empresa Pública (EDTL, E.P), liu-husi unidade tékniku distribuisaun no apoiu konsumedor, hahu instala no reativa hikas kontador pré-pagu ba kliente sira iha aldeia zero III, suku fatuhada (eis-merkadu komoro), Kuarta semana ne’e.
Objetivu husi instalasaun kontador pre-pagu refere atu eduka kliente sira poupa enerjia no kontribui reseita ba iha governu, bazeia ba Lei númeru 33/2016, 16 Agostu, ne’ebé koalia kona-ba tarifa EDTL, E.P inklui koima sira, nune’e kliente hotu iha dever selu ka sosa pre-pagu bainhira uza enerjia elétrika.
Xefi Aldeia Zero III Sr. Zeferino Braz hatete total uma ne’ebé identifikadu la uza kontador pré-pagu hamutuk atus-rua resin, no iha uma balu ne’ebé antes ne’e EDTL, E.P instala ona, maibe komunidade sira desliga hodi halo ligasaun direta.
Ohin ekipa ne’ebé lidera husi Xefi Inspesaun téknika Sr. Xisto Caitano Ximenes, konsege halo ona instalasaun no reativa hikas kontador pré-pagu ba uma kuaze atus ida no tuir estimasaun sei finaliza iha fulan ne’e.
Sr. Xisto hateten tékniku EDTL, E.P hahu instala fila-fali kontador pré-pagu ba kliente sira ne’ebé durante ne`e seidauk utiliza no re-ativa hikas kontador pré-pagu ne’ebé antes ne’e instala ona.
Alende ne’e komunidade iha área refere koopera no fasilita ekipa tékniku sira halo servisu instala no re-ativa hikas kontador pre-pagu ba kliente sira.
Média, EDTL, E.P
Comments ( 0 )