Díli, 20 Janeiru 2023: Prezidente Komisaun Ezekutiva EDTL, E.P Dr. Paulo da Silva hasoru malu ho Sua Eselénsia Primeiru-Ministru Taur Matan Ruak, sesta-feira ne’e iha Palasiu Governu hodi atualiza servisu no programa esensiais sira ne’ebé atinje ona iha tinan 2022, hanesan fornesimentu eletrisidade ba populasaun ne’ebé atinje ona 91%, hasa’e reseitas eletrisidade projesaun dolár amerikanu milaun hatnulu ($ 40 milloins) ba dolár amerikanu milaun hatunulu resin-ualu resin (48.36 milloins) nomós aprezenta planu foun sira ba tinan 2023 nian.

 

“Ohin sua Eselénsia bolu atu partilla kona-ba progresu sira ita halo iha tinan kotuk 2022 nomós partilla ba Sua Eselénsia planu no atividade esensiais sira ne’ebé ita halo iha tinan ida ne’e, progresu sira ne’e ita atinje iha tinan kotuk ida maka ita hasa’e rasiu eletrifikasaun ba suku sira ne’ebé uluk ita asesu to’o 85% a nivel suku i daudaun to’o dezembru ita sa’e ona ba 91% entaun ita hela suku 41, ne’ebé iha hela faze konstrusaun nia laran, ita nia espetativa iha fulan haat lima mai sira konklui depois para bele asesu ahi.

Progresu seluk maka ita relata mós kona-ba rekolla reseitas ho tinan kotuk ita nia projesaun $40 milloins mais ho ezersísiu ne’ebé iha, monta kontadores no halo inspesaun rutina, ita konsege ultrapasa ita nia projesaun ba iha $48, 36 milloins, ne’e progresu ida ne’ebé iha” hatete prezidente EDTL, E.P.

 

Progresu ida ne’ebé ita iha estudu rua ne’ebé ita konklui ona konversaun mina ba gás ne’ebé konklui tiha ona, ida seluk mak solar painel Tenaga surya ne’e konklui tiha ona, agora dadauk ita aselera uluk maka solar sel, ita prepara tiha ona dokumentu ba tenderizasaun iha hela faze tradusaun ba lian ofisiál tuir ita-nia lei foun aprovizionamentu haruka ita nia espetativa iha fulan ida ne’e ou inisiu febereiru ita lansa ona tenderizasaun internasionál para ita harii solar painel iha Manatutu minimu 70MW ou 80MW ne’ebé ita harii iha Manatutu.

 

Alende ne’e, serbisu seluk hanesan instalasaun lampu iluminasaun ba kapitál munisípiu hitu mak hanesan ita konklui 100% ona, agora daudaun halo ezersísiu para e depois aumenta tan capital seluk hanesan Aileu, Ainaro, Ermera nomós Maliana, Ataúru. Serbisu seluk tan mak apoiu KOIKA nomós ita harii 1MW Solar iha Ataúru serbisu hahú iha marsu tinan ida ne’e 2 MW sei rai enerjia ita uza iha kalan ba iha Ataúru ida ne’e preparativus la’o hela tempu besik asina akordu para marsu ne’e hahú serbisu”, esplika Prezidente EDTL hafoin remata sorumutu.

 

Enkuantu tu fasilita servisu EDTL, E.P mós instala sistema financial management, no uza sistema ne’e halo jestaun ba ita-nia finansiamentu nomós asset sira nomós serbisu administrasaun sira nian.

Iha parte seluk EDTL mós halo hela estudu atu monta tan Sub Estasaun rua, ida iha Tibar ne’ebé sei konekta ba Portu Tibar, AINPL, nomós zona sira iha Tasi Tolu, no Tibar inklui futuru Zona Industria Tibar ne’ebé iha hela faze dezenvolvimentu, enkuantu Sub Estasaun Seloi-Aileu, sei kobre ba Munisípiu Ermera no Maubisse, ne’ebé daudaun ne’e foti hosi Sub Estasaun Kamea, no daudaun ne’e EDTL hadi’ak mós jeradór iha EDTL Sentrál Komoro ne’ebé abandona kuandu Sentrál Hera funsiona, nune’e bele back-up karik liña jerál hosi Hera monu ka kortes.

 

Média, EDTL, E.P