Díli, 20 Janeiru 2023: Eletrisidade de Timor-Leste, Empresa Pública liu-husi Prezidente Komisaun Ezekutiva Dr. Paulo da Silva, partisipa grande entrevista hamutuk ho jornalista Espedito Dias Ximenes no Prezidente Bee Timor-Leste Carlos Peloi, iha kanál televizaun Grupo de Média Nacionál (GMN-TV), iha estúdiu sentrál Bebora-Díli, kinta-feira (19/01/2023).

Dr. Paulo da Silva hatete atinjimentu servisu EDTL, E.P nian hafoin transforma husi diresaun jerál ba empreza, EDTL, E.P perioritiza servisu produsaun enerjia iha sentraís, funsionamentu rede transmisaun, distribuisaun no komersializasaun enerjia, tanba ne’e EDTL, E.P promove óbra sira hanesan estudu viabilidade ba konversaun diesel - gas ba sentrál elétrika sira no projetu solar PV iha munisípiu Manatuto, enkuantu estudu hirak ne’e EDTL, E.P konklui ona, dadaun ne’e ona finalizasaun dokumentu hodi prepara ba tender.

Liu-husi implementasaun projetu eletrifikasaun nasionál EDTL, E.P konsege hasa’e rásio eletrifikasaun husi 85 % ba 91% asesu eletrisidade (projetu hirak ne’e implementa iha 41 sukus, la-inklui RAEOA) tuir espetativa EDTL, E.P nian, iha meadu tinan ne’e sei konklui a nivél suku, ba aldeia atus-rua sianulu resin ida (291 aldeias) EDTL, E.P aselera dala liña eletrisidade liu-husi implementasaun polítika eletrifikasaun komunitária no Solar Home Lighting System ba komunidade sira iha áreas remotas rejistadu hamutuk 1091 familias/uma. Ho pograma hirak ne’e tinan 2024 EDTL, E.P bele konklui ona 100% taxa kobertura asesu eletrisidade iha teritóriu nasionál.

Instalasaun kontador pré-pagu ba kliente sira, EDTL, E.P sosa hamutuk 108 mil kontadores pré-pagu no konsege instala ona kuaze 90 mil kontadores pré-pagu iha munisípiu sira inklui kapitál Díli. Alende ne’e projesaun kolekta reseitas iha tinan 2022 EDTL, E.P ultrapasa tárjetu husi dolár amerikanu milaun $ 40 ba dolár amerikanu milaun $ 48.36. Solar streetlight no iluminasaun sidade kapitál iha munisípiu hitu hanesan, munisípiu Díli, Liquisá, Covalima, Manufahi, Baucau Manatuto no Lautem óbra hirak ne’e konkluidu no dadaun ne’e lakan hotu ona, ba munisípiu lima ne’ebé seidauk EDTL, E.P prepara ona dezeñu no sei implementa iha tinan ida neé. Alende ne’e, programa seluk mak EDTL, E.P mós instala sistema foun ho naran FMS hodi ajuda jestaun servisu empreza nian.

Maske nune’e ho kondisoen balu, komunidade lamenta kualidade fornesimentu enerjia elétrika (ahi mate-lakan) iha kapitál Díli no munisípiu sira. Prezidente EDTL, E.P rekuñese, kestaun hirak ne’e akontese tanba kauza husi intalasaun liña eletrisidade ne’ebé ejiste tuan, kapasidade utilizasaun transformador prinsipál iha sub-estasaun Camea kuaze atinji ona 90% no kauza seluk husi dezastre naturais. Tanba ne’e EDTL, E.P liu-husi kompaña sira tenke halo manutensaun iha fim de semana.

Enkuantu atu hadiak kualidade fornesimentu enerjia elétrika ba kliente sira iha munisípiu Díli, EDTL, E.P halo ona servisu preparativu ba instalasaun transformador ho kapasidade máximu 40 MVA iha sub-estasaun Camera no dadaun ne’e konstrusaun lao hela.

 

Média, EDTL, E.P