Díli, 16 Janeiru 2023: Prezidente Komisaun Ezekutiva Eletridade de Timor-Leste, Empresa Pública Dr. Paulo da Silva ho komitiva halo diálogu ho komunidade sira iha Suku Bahalarawain, Postu Administrativu Vikeke-Vila, Munisípiu Vikeke, hodi ko'alia kona-ba implementasaun liña Eletrisidade iha àrea We-Luli (Sábadu, 14/01/2023).

Iha intervensaun xefi suku Bahalarawain hatete, aldeia We-Luli ho total uma-kain hamutuk sianulu resin-neen (96) ne'ebé seidauk asesu eletrisidade.

“Ho vizita prezidente EDTL, E.P nian iha fatin ne’e, ami fiar katak implementasaun projetu dada liña eletrisidade mai aldeia We-luli bele realiza. Ami kompromete hamutuk ho komunidade sira prontu kontribui servisu hamutuk ho EDTL hodi harí-Airin no oferese tesi sira nia Ai-horis sira ne'ebé kona liña, no promete katak sei la iha impedimentu durante prosesu implementasaun nia laran”.

Prezidente Komisaun Ezekutiva EDTL, E.P Dr. Paulo da Silva hatete EDTL, E.P sei tau konsiderasaun ba preokupasaun komunidade sira nian ne’ebé seidauk asesu eletrisidade. Enkuantu atu dada eletrisidade ba populasaun sira ne’ebé durante ne’e seidauk asesu eletrisidade ne’e tama bá programa prioridade EDTL. E.P nian.

“Hafoin EDTL transforma husi diresaun jerál bá empresa públika iha tinan rua kotuk, simu kedas orientasaun husi S.E Primeiru Ministru, General Taur Matan Ruak atu rezolve 15% suku ne’ebè mak komunidade sira sedauk asesu bá eletrisidade. Ho nune’e EDTL, E.P. lansa konkursu públiku ba prosesu implementasaun eletrifikasaun iha suku sira ne’ebé mak fahe bà etapa tolu, inklui suku Nanu'u iha munisipiu Kovalima, suku Fatumakerek iha munisipiu Manatuto, no suku Fatukalu iha munisipiu Manufahi, ne’ebè dadaun ne’e iha prosesu avaliasaun tékniku nia laran no iha tempu besik sei implementa”.

Dr. Paulo hatutan, bá aldeia sira ne'ebè seidauk asesu, EDTL iha polítika programa elétrifikasaun komunitáriu (PEK) hodi responde bá populasaun sira ne’ebé nia hela fatin ho distánsia 1km-3km ho servisu hamutuk entre EDTL no komunidade hodi aselera instalasaun eletrisidade bá populasaun.

“Ho nune'e We-Luli rasik tama iha programa ida ne’e. Sr. Presidente informa katak simu ona proposta husi We-Luli no orienta EDTL iha Munisípiu Vikeke hodi fó prioridade bá Weluli hodi tama bá iha programa eletrifikasaun komunitária. Iha semana oin Ekipa EDTL. E.P sei tun terenu atu halo verifikasaun bá proposta ne'e hahu husi Klarerek Mutin to’o We-luli atu hatene lolos distánsia, depois halo deseña atu nune'e sira halo akizasaun material bá Díli hafoin autoriza atu nune'e bele hahu konstrusaun”.

Alende ne’e, Xefe do Suku Bahalarawain  husu bá nia komunidade sira atu servisu hamutuk ho ekipa EDTL hodi aselera prosesu implementasaun projetu ne’e iha aldeia We-luli. Suku Bahalarawain kompostu husi aldeia neen (6) ho total populasaun hamutuk rihun lima.

Média, EDTL, E.P