Kovalima, 13/01/2023, Vise-prezidente Komisaun Ezekutiva EDTL, E.P, Sr. Humberto Pereira, partisipa iha Serimónia Inaugurasaun sistema bee moos, ne'ebé kanaliza husi Cruz Vermelha Timor-Leste (CVTL), iha Aldeia Hatu no Lela, Suku Holpilat, Postu Administrativu Maucatar.

Hafoin inagura sistema bee mos iha aldeia refere, S.E Ministru Obras Públika Eng. Abel Pires da Silva husu komunidade sira atu uza bee tuir nesesidade no kuidadu fasilidade ne’ebé instala iha área ne’e. alende ne’e agredese ba parseiru dezenvolvimentu sira ne'ebé durante ne’e apoiu governu, liu-liu CVTL ne’ebé kanaliza ona sistema bee moos ba komunidade sira, iha Aldeia Hatu no Lela, Suku Holpilat.

Iha biban ne'e, Vise-prezidente EDTL, E.P Sr. Humberto Pereira partilla mós informasaun kona-bá taxa kobertura asesu eletrisidade iha munisípiu Kovalima, kuaze atinji ona sem pursentu, falta suku ida (Suku Nano). Enkuantu iha suku Nano halo ona levantamentu dadus husi enjineiru PMU EDTL, E.P, dadaun ne’e iha ona prosesu avaliasaun, no implementasaun projetu eletrifikasaun iha suku Nano sei hahu iha primeiru trimester tinan ne’e.

Iha Serimónia ne'e, partisipa husi Ministru Obras Públika, Diretór Jerál MOP, Prezidente K.E BTL, E.P, Vise-Prezidente EDTL, E.P, Sekretáriu Jerál CVTL, Reprezentante Administradór Munisípiu Covalima, Administradór Postu Administrativu Maucatar, Xefe Suku sira, Autoridade seguransa PNTL, F-FDTL, komunidade sira no mos partisipante sira seluk.

Média EDTL, E.P