Kovalima, 13 Janeiru 2023: Governu da-ualu liu-husi Ministériu Obara Públika hamutuk ho Eletrisidade de Timor-Leste, Empresa Pública (EDTL, E.P), ofisialmente halakan eletrisidade ba komunidade uma-kain lima-nulu resin iha aldeia Laen-tolu no Webo'ot, suku Suai-Loro, munisípiu Covalima, sexta semana ne’e.

Iha intervensaun S.E Ministru Obras Públika, Eng. Abel Pires da Silva agradese ba ekipa tékniku EDTL, E.P no komunidade sira iha Aldeia Laen-Tolu no Webo’ot ne’ebé durante ne’e servisu hamutuk hodi implementa projetu eletrifikasaun komunitária iha aldeia refere.

“Agradese bai mi hotu ne’ebé servisu iha terrenu liu-liu tékniku EDTL, E.P ne’ebé halo instalasaun ba liña no aman-inan, joven sira hotu ne’ebé involve direta halo servisu naun-tékniku, ohin governu ofisiliza halakan ona eletrisidade tanba ne’e husu ba imi hotu tau-matan no kuidadu fasilidade hirak ne’ebé instala iha área ne’e’’.

Alende ne’e S.E Ministru hato’o mos mensajen S.E Primeiru Ministru Jenerál Taur Matan-Ruak nian, ba komunidade sira iha aldeia refere, maun Taur senti kontenti los tanba aman-inan sira ohin loron asesu ona eletrisidade’.

Iha biban ne'e Vise-prezidente EDTL, E.P Humberto Pereira hatete empreza estatal EDTL sei distribui enerjia eletrika ba suku no aldeia sira ne’ebé seidauk asesu, tinan ne’e iha nivel suku atinji ona 91% assesu enerjia elétrika no primeiru trimester EDTL, E.P konklui projetu Eletrifikasaun iha nivél suku ne’ebe falta 9% sedauk asesu eletrisidade.

EDTL, E.P halo mudansa no konsege hasa’e taxa kobertura asesu eletrisidade bá suku sira ne’ebé durante tinan barak seidauk asesu enerjia elétrika, liu-husi implementasaun Programa Eletrifikasaun Nasionál (PEN), Projetu Eletrifikasaun Komunitáriu (PEK) no Projetu Solár PV bá Area Remotas.

“Liu-husi programa governu da-ualu ne’ebé orienta husi S.E Primeiru Ministru, maun Taur Matan-Ruak, implementasaun Projetu Eletrifikasaun, EDTL, E.P konsege implementa iha suku ne’en-nulu resin ne’en inklui projetu ne’ebé EDTL, E.P promove iha suku tolu hanesan suku Fatukalu, Nanu’u no Suku Fatumakerek. Tinan ne’e EDTL, E.P liu-husi programa eletrifikasaun komunitária, sei servisu hamutuk ho komunidade hodi aselera instalasaun eletrisidade ba aldeia sira ne’ebe seidauk asesu. Ohin ita konklui ona Primeiru projetu eletrifikasaun komuntária iha aldeia Webo’ot no Laentolu, ne’ebé Sua-Exelênsia Ministru Obras Públika Ofisialmente halakan ona Eletrisidade, tanba ne’e EDTL, E.P husu atu uza eletrisidade ho kuidadu, seguru no responsabilidade atu nune’e labele kauza vítima husi enerjia elétrika ne’e rasik”.

Komunidade sira senti kontenti no agradese ba oitavu governu liu-husi EDTL, E.P bele responde ona preokupasaun komunidade nian iha suku no aldeia sira ne’ebé durante tinan barak seidauk asesu eletrisidade.

Enkuantu to’o fim do mes dezembru 2022, EDTL, E.P ofisialmente halakan eletrisidade ba uma-kain rihun-hat atus-tolu ruanulu resin-rua (4322), iha aldeia nennulu resin-nen (66) ho distâsia instalasaun media tensaun 139.12 kilómetrus sirkuitu, baixa tensaun hamutuk 180 kilómetrus sirkuitu no poste transformador ne’ebé instaladu hamutuk 30.

 

Média, EDTL, E.P