Díli, 05 Janeiru 2023: Komisaun Ezekutiva hamutuk ho responsavél EDTL, E.P munisípiu, inklui tékniku enjineiru sira, kinta-feira semana ne’e halo ezersísiu koletivu hodi produz matadalan ba implementasaun polítika eletrifikasaun komunitária iha aldeia sira ne’ebé dadaun ne’e seidauk asesu eletrisidade.

Prezidente Komisaun Ezekutiva EDTL, E.P Dr. Paulo da Silva hatete Polítika eletrifikasaun komunitáriu hetan aprovasaun husi konsellu administrasaun iha tinan 2022 no sei hahu implementa iha fulan ne’e, tanba ne’e husu atu servisu ho lalais, kualidade no seguru.

“Polítika eletrifikasaun komunitáriu hetan aprovasaun husi konsellu administrasaun iha tinan 2022, tanba ne’e ita hakarak aselera implementasaun polítika ne’e iha aldeia sira ne’eb’e dadaun ne’e seidauk asesu eletrisidade, tanba ne’e ohin prosesu inisíu husi implementasaun polítika ida ne’e. entaun antes implementa iha terrenu ita bolu diresaun relevante sira diskute hamutuk hodi produz matadalan ba utilizasaun no harmoniza pensamentu sira hadi halo jestasaun ba implementasaun polítika ne’e rasik”.

Nia hatutan, Implementasaun polítika eletrifikasaun komunitária hahu implementa iha fulan ne’e, liu-liu obrá sira ne’ebé ho volume servisu ki’ik, ho distâsia kilómetru tolu mai-kraik, bazeia ba proposta husi responsavél EDTL, E.P munisípiu sira nian. Obrá ne’e sei implementa hosi EDTL, E.P no servisu hamutuk komunidade sira nune’e bele aselera lalais fornesimentu enerjia elétrika ba aldeia sira ne’ebé seidauk asesu eletrisidade. Iha implementsaun óbra refere EDTL, E.P prepara insentivu ba komunidade sira ne’ebé involve direta iha servisu.

Komisáriu Ezekutivu Servisu Tékniku, Eng. Latino Jerónimu husu tékniku sira atu halo identifikasaun no levantamentu dadus ba benifisiáriu sira ne’ebé los no forte, nune’e submete ba planeamentu hodi halo implementasaun.

Óbra ne’e rasik sei implementa iha aldeia hamutuk atus-rua resin, ba tinan ne’e EDTL, E.P prevé orasamentu kuaze dolár amerikanu milaun ne’en ($ 6 milhoes) ba implementasaun polítika eletrifiksaun komunitária. Alende ne’e EDTL, E.P mos promove programa enerjia rural ba aldeia izoladu sira, ne’ebé iha tinan ne’e EDTL, E.P sei fornese enerjia liu-husi solar-paneis ba uma identifikadu hamutuk rihun-ida resin (1.090 casas).

Media, EDTL, E.P