Builo 23 Dezembru 2022: Prezidente Komisaun Ezekutiva EDTL,E.P. Dr. Paulo da Silva ho Komitiva hamutuk ho Autoridade lokal  no Veteranu ofisialmente hodi VIII Governu nia fatin halakan eletrisidade bá komunidade sira iha iha suku Builo, Uabubo, Nahareka no Waibobo Postu administrativu Ossu  Vikeke. 

Iha intervensaun Prezidente Komisaun Ezekutiva EDTL,E.P. DR.Paulo da Silva hato'o  agradese no apresia ba Autoridade Lokal no komunidade hotu ne’ebé mak apoiu makaas durante prosesu konstrusaun bá projetu implementasaun nune’e ohin loron EDTL mai halakan eletrisidade bá itaboot sira. Dr. Paulo da Silva hateten ohin EDTL mai hodi ofisializa hatama ahi bá  komunidade sira, maske  obra balun sei iha prosesu finalizasaun nian laran. Aldeia ida ne’e konklui ona, hodi ohin loron EDTL loke ahi bá sira hodi nune'e loron boot Natal sira asesu ona enerjia elétrika, ida ne’e laos serimonia inagurasaun tamba EDTL labele inagura rasik nia servisu.

Dr. Paulo da Silva partilla mos mensagem husi SE PM Taur Matan Ruak ne’ebe mak hato’o nia agradesimentu bá suku haat nomos fó kumprimentus no hakuak boot bá Nai Xefe Suku, Autoridade Lokal no komunidade bá servisu hamutuk hodi Suku Builo, Uabubo, Nahareka no Waibobo assesu eletrisidade.

 Entertantu  Prezidente mós partilla kona-bá knar EDTL hafoin transforma husi diresaun ba EP simu kedas orientasaun husi Governu ne’ebé hodi atu konklui projetu Eletrifikasaun iha Timor ne’ebe falta 15% , kobre suku 59 iha Timor Leste mak sedauk asesu eletrisidade. Saida mak EDTL halo mak fahe servisu ba Faze Haat hanesan:

1. Pakote 34 kobre 23 sukus

2. Pakote 44 kobre 17 sukus

3. Pakote 36 kobre 23 sukus

4. Ikus liu suku 3 ne’ebé EDTL foin promove mak Suku Fatukalu (Munisìpiu Manufahi) suku Nanu’u (Munisìpiu Kovalima) no Fatumakerek (Municipio Manatuto). 

Ho ida ne’e EDTL konklui ona prosesu a nivel  Suku iha teritóriu tomak, besik tinan rua nia laran EDTL promove projetu besik duzentus e tal husi projetu ne’e EDTL loke konkursu tomak, halo esforsu hotu no maioria parte konklui ona, to'o fim dezembru a nivel suku 91% assesu enerjia elétrika, hela 9% EDTL koko konklui iha primeiru trimestre iha tinan 2023. Esforsu ne’ebé EDTL halo hodi garante bá Metas VIII Governu nian liu-liu iha setor enerjétiku, garante assesu enerjia elétrika a nivel Suku.

Bá Aldeia sira ne’ebé seidauk assesu, EDTL iha programa ida bolu projetu komunitáriu, ne’ebe EDTL sei servisu hamutuk ho komunidade hodi aselera instalasaun eletrisidade bá sira nia aldeia rasik ne’ebe seidauk asesu. No husu bá autoridade sira atu hatama proposta bá Aldeia sira no ba sira ne’ebé hela iha áreas mais remotas, EDTL hatama iha planu no distribui Panel solar bá sira. Tinan ida ne’e EDTL fornese Solar panel hamutuk 1091 unidades bá uma, espera iha aldeia Vikeke mós sei benefisia husi programa ne’e. Bá sira ne’ebé assesu ona enerjia tenke uja ho didiak, se ita loke ahi iha tempu loron nia sei afeta bá durasaun lampu ne’e rasik, no sei afeta ba ita nia sentral Betano no Hera.

 Iha Tempu hanesan Diretór ANE, I.P. Sr. Julio  Hato’o agradesimentu bá prezidente EDTL, E.P. tamba EDTL,E.P. sai empresa tinan rua maibé   sira esforsu makaas hodi  lori tama eletrisidade bá suku sira iha territóriu tomak  No hato’o Parabéns bá diretór kompaña ne’ebé mak finaliza ona implementasaun projetu. Husu bá inan aman sira atu uza ahi ho diak, labele halo asaun wainhira uza kontador pre pago, nomós nafatin kolabora ho EDTL,E.P. wainhira iha avaria ruma. Aleinde ne'e Sr. Julio mós hateten “ANE,IP hanesan autoridade ida ne’ebé regula eletrisidade. Knaar ne’ebé ANE,IP halo mak hanesan regula no tau matan bá obra/projetu sira ne’ebé implementa husi kompaña sira.”

 Nai Xefe Suku hodi komunidade nia naran hakarak hato'o agradesementu no Louva bá VIII Governu Konstituisional ne’ebé lidera husi SE Taur Matan Ruak, tamba komunidade suku haat (4) durante tinan barak la hetan eletrisidade, maibé ohin loron hetan ona sira nia direitu bá asesu eletrisidade. 

Administrador postu administrativu Ossu hato’o :“agradesimentu bá VIII Governu ne’ebé lidera husi General Taur Matan Ruak liu husi EDTL,E.P. hodi dada eletrisidade  mai suku haat ne’e rasik.”

 Suku  Builo  kobre  aldeia tolu (3) hanesan Lalabu, Builo no Abana, no obra ne’e implementa husi kompaña   Zahine Unip, Lda JV Bozer Construcao Unip Lda

Suku Naherka Aldeia ida (1) mak Abana-Watumalul, implementa husi kompaña  Uai-cana Unip,Lda JV  Esmelia II Electric Unip.Lda  

Suku Uabubo kobre aldeia tolu (3): Tagaba-Dasinaha, Dalirisi-Sede no  Suco Uabubo, implementa husi kompaña Lufiamor Unip,Lda JV Chagas 55 Unip.Lda

No suku Waibobo aldeia ida (1) mak Abana-Lekibuti ne’ebe implementa husi kompaña Minro Vinda Unip.Lda JV Esmelia II Electric Unip.Lda