Díli, 27 Fevereiru 2023: Prezidente Komisaun Ezekutiva EDTL, E.P Dr. Paulo da Silva hala’o enkontru ho Sua Eselénsia Primeiru-Ministru Taur Matan Ruak, Segunda-feira ne’e iha Palasiu Governu hodi atualiza servisu no programa esensiais sira hanesan projetu eletrifikasaun, inklui lansamentu tenderizasaun internasional ba projetu solar PV ho kapasidade 72 – 85 MW ne’ebé ohin EDTL, E.P lansa.

“Ohin sua Eselénsia bolu atu partilla kona-ba progresu sira ita halo iha tinan kotuk 2022 nomós partilla ba Sua Eselénsia planu no atividade esensiais ne’ebé ita halo iha tinan ne’e, progresu sira ne’e ita atinje mak konsege hasa’e rasiu eletrifikasaun a nivel suku atinji 91%, entaun ita hela suku 41, ne’ebé iha hela faze konstrusaun nia laran, ita nia espetativa iha fulan haat lima mai sira konklui depois para bele asesu ahi”.

Alende ne’e, Prezidente EDTL, E.P partilha mos informasaun ba S.E Primeiru Ministru kona-ba tenderizasaun internasional ba projetu solar PV iha Laleia-Manatuto ne’ebé ohin EDTL, E.P lansa, espera iha tempu besik bele hetan manan-nain hodi halo investimentu ba projetu ne’e.

Nune’e mos melhoramentu kapasidade transformador iha Camea, ne’ebé dadaun ne’e fornese enerjia ba kapitál Díli, iha ona faze final produsaun trafo ho kapasidade 40 MVA ne’ebé dadaun ne’e iha ona prosesu transportasaun mai Timor. Espera iha fulan Abril ita konklui instalasaun nune’e aumenta kapasidade ba 100MVA, nune’e bele fornese ba kapital Díli, tanba dadaun ne’e klientes aumenta.

Enkuantu EDTL, E.P fahe ona solar painel 1091 unidades ba komunidade sira ne’ebé hela iha área remotas, tuir planu iha semana oin kompaña sira sei ba halo instalasaun ba área sira ne’ebé sai benifisiarius.

 

Média, EDTL, E.P