Díli, 18 Fevereiru 2023: Prezidente Komisaun Ezekutiva Eletrisidade de Timor-Leste, Empresa Pública (EDTL, E.P) Dr. Paulo da Silva, akompaña husi Sekretária Ezekutiva Sra. Herminia Marçal da Costa hamutuk ho Xefi Divizaun Munisípiu Lautem, Sr. Chiqiuto dos Santos, Sexta-feira ne’e, hala’o enkontru ho funsionáriu EDTL, E.P iha Edifísiu EDTL, E.P Munisípiu Lautem.

Objetivu husi enkontru ne’e, atu atualiza servisu EDTL, E.P nian iha Munisípiu Lautem no rona direta preokupasaun funsionáriu sira nian ne’ebé durante ne’e enfrenta.

Xefi Divizaun EDTL, E.P, Sr. Chiquito dos Santos hatete, Munisípiu Lautem kompostu husi Postu Administrativu ne’en, Suku Tolunulu resin-hat no Aldeia Atus ida limanulu resin-ida ne’ebé kuaze komunidade sira asesu ona liña eletrisidade, husi númeru ne’e hela Aldeia sanulu resin-sia ne’ebé seidauk asesu eletrisidade, no dadaun iha hela prosesu implementasaun projetu eletrifikasaun.

Iha biban ne’e Sr. Chiquito dos Santos aprezenta mòs preokupasaun balu, liu-liu apoiu logístika hanesan transporte hodi apoiu servisu tékniku sira nian bainhira halo atendementu ba avarias iha munisípiu refere.

“Iha biban ida ne’e, husu ba S.E Prezidente EDTL, E.P, atu apoiu tan transporte, tanba EDTL, E.P Munisípiu Lautem dadaun ne’e menus karreta, nune’e difikulta servisu tékniku sira nia bainhira atu halo atendementu avarias ho lalais. Alende ne’e, hato’o mos preokupasaun balu kona-ba servisu extra (overtime)”.

Hatan ba preokupasaun hirak ne’e, Prezidente Komisaun Ezekutiva EDTL, E.P Dr. Paulo da Silva hatete, EDTL, E.P tenke servisu ho lalais, kuailidade no seguru, ne’e importante tebes. Tanba ne’e anota preokupasaun hirak ne’e hodi hadiak iha tempu badak.

“Klaru que preokupasaun no dezafius hirak ne’e presiza responde ho lalais, hanesan edifísiu dadaun ne’e halo ona levantamentu no tinan ida ne’e ita hahu ona halo prosesu aprovizionamentu, ne’e sei fo prerioridade ba Munisípiu Lautem, hafoin munisípiu sira seluk.

Alende ne’e, iha segundu trimester 2023, EDTL, E.P sei halo prosesu rekrutamentu hodi aumenta rekursu umanu ba reforsa servisu iha nivél postu, tanba tárjetu EDTL, E.P nian mínimu kada suku funsionáriu destakadu nain ida, atu nune’e bele kobre servisu ho lalais”.

Dr. Paulo mós promete sei halo despaixu ida hodi rekoloka transporte balu ba apoiu servisu iha Munisípiu Lautem, iha segundu trimenstre tinan nemos EDTL, E.P sei halo prosesu aprovizionamentu ba transporte, hafoin halo revizaun ba orsamentu hodi sosa karreta ba apoiu servisu tékniku iha munisípiu sira.

Enkuantu Lidér Máximu EDTL, E.P ne’e husu ba funsionáriu sira atu uza sasan ho kuidadu, responsabilidade no husu atu uza tuir ezizensia servisu, tanba ne’e empreza nia propriedade, importante tebes fo atensaun. Husu mos atu funsionáriu EDTL, E.P hotu kuida imajen EDTL nian no kria ambiente kondusivu no respeita malu tantu feto ho mane iha fatin servisu.

Dadaun EDTL, E.P Munisípiu Lautem rejista kliente utilizador enerjia elétrika hamutuk 12,989 (rihun sanulu resin-rua atus sia ualunulu resin-sia).

Média, EDTL, E.P