Díli, 23 Fevereiru 2023: Eletrisidade de Timor-Leste, Empresa Pública (EDTL, E.P) liu-husi Tékniku Distribuisaun Apoiu Konsumedor, ne’ebé lidera husi Sr. Paulino da Costa Amaral, Kinta semana ne’e, hala’o inspesaun ba kontador pré-pagu iha uma komunidade nian, iha área Temporal, Berbidu, Suku Lahane, Munisípiu Díli.

Iha inspesaun ne’e, ekipa tékniku EDTL, E.P identifika uma-kain ne’en (6) ne’ebé halo ligasaun direta/ilegal, hodi uza hala’o atividade negósiu no uza ba sasan eletróniku sira seluk.

Relasiona ho aktu hirak ne’e, bazeia ba Lei Númeru 33/2016, 16 Agostu ne’ebé hatete kliente hotu iha dever sosa pré-pagu baimhira uza enerjia elétrika, ekipa tékniku EDTL, E.P halo kedas desligasaun no monta kontador pré-pagu foun ba uma hirak ne’e no notifika hodi aplika multa bazea ba kategoria uzu enerjia.

Maske nune’e, komunidade iha área refere koopera hodi selu bazeia ba multa ne’ebé EDTL, E.P aplika.

Alende ne’e, tuir planu Eletricidade de Timor-Leste, Empresa Pública (EDTL, E.P) sei kontinua halo inspesaun jerál ba kontador pré-pagu ne’ebé instaladu iha Munisípiu sira inklui Díli.

Média, EDTL, E.P