Cambodia, 10 Fevereiru 2023: Prezidente Komisaun Ezekutiva, Eletrisidade de Timor-Leste, Empresa Pública (EDTL, E.P) Dr. Paulo da Silva hamutuk ho ekipa no akompaña husi ADB, hala’o vizita offisiál ba Kampong Chhnang 60 Mw Pv Solar Power Plant, kinta-feira ne’e.

Objetivu husi vizita ne’e, atu halo estudu komparativu ida no hetan referênsia ba planu implementasaun solar iha Laleia, Munisípiu Manatuto, ne’ebé hetan apoiu tékniku husi ADB hodi lansa tenderizasaun ba implementa refere iha tempu besik ho mínimu kapasidade 72 MW bazea ba rezultadu estudu.

Hafoin vizita Prezidente Komisaun Ezekutiva EDTL, E.P Dr. Paulo da Silva hatete, vizita refere foku ba planeamentu, Sistema jestaun no komersializasaun ba sistema ne’e rasik, ohin ekipa EDTL, E.P diretamente hare’e besik-liu fízikamente instalasaun ba sistema ne’ebé kualidade no modernu ne’ebé instaladu ho kapasidade máximu 60 MW iha fatin ne’e, no fasil atu reaplika iha Timor-Leste. 

“Ohin ita hare’e maneira instalasaun, Sistema dezeñu, controlling no liga ho aspetu seluk ne’ebé importante tebes hanesan kestaun rai, ambiente, sosiál nomos aproveitamentu kria kondisoens ba ema ne’ebé servisu lokál tantu estranjeiru, hanoin ne’e importante tebes ba ita bainhira ita implementa ita nia projetu rasik”.

Enkuante durante vizita ekipa EDTL, E.P hetan akompñamentu husi responsavél Kampong Chhnang 60 Mw Pv Solar Power Plant Cambodia no fahe experensia kona-ba implementasaun Fase I no II Planta Solar PV iha Provínsia Kampong Thom-Cambodia, ho kapasidade máximu 60 MW to’o 100 MW ne’ebé resentemente konkluida no liga ona ba rede nasionál no atinji presu rekorde baixu liu iha eskala de utilizasaun solar PV iha Sudeste Aziátiku ho $0,026 por kWh.

***

Média, EDTL, E.P