Manatuto, 13 Marsu 2023: Governu Da-Ualu liu-husi Empresa Estatal, Eletricidade de Timor-Leste, (EDTL, E.P) hamutuk ho Ministériu Obras Pública, halo ona markasaun ba sítiu projetu Solar-PV iha Postu Administrativu Laleia, Munisípiu Manatuto, Segunda-Feira ne’e (13/03/2023).

Investimentu ba projetu Solar-PV iha Laleia-Manatuto hanesan investimentu privada, ne’ebé aplika modelu IPP (Independent Power Producer), signifika setor privadu ne’ebé manan projetu refere sei investe kapitál hodi halo konstrusaun, operasaun no manutensaun, hafoin ne’e, EDTL, E.P sosa enerjia ne’ebé injeta ba liña nasionál.

Iha diskursu Prezidenti Komisaun Ezekutiva EDTL, E.P Dr. Paulo da Silva hatete, ba implementasaun projetu solar-PV dadaun ne'e iha ona prosesu tenderizasaun, tuir estimasaun husi EDTL, E.P iha Setembru tinan ne’e, asina ona akordu investimento depois kontinua ho konstrusaun no instalasaun parke solar-PV ho kapasidade mínimu 72 MW to’o 85 MW, sub-estasaun no armazenamentu bartarea ho kapasidade 36 MWh.

“Relasiona ho implementasaun projetu ne’e, husu lisensa ba rai-nain, lulik sira, lia-nain no komunidade Munisípiu Manatuto ho permisaun ita hotu nian hamutuk ho Sua Exelénsia Ministru Obras Públika, ohin ita hahu harí plaka iha fatin ida ne’e”.

Alende ne’e, Sua Exelénsia Ministru Obras Públika Eng. Abel Pires agradese ba esforsu EDTL, E.P nian hodi dezemvolve Sistema elétrika iha Timor-Leste, hodi reduz dependésia ba mina ne’ebé uza ba mákina sira iha Sentral Elétrika Hera no Betano.

“Projetu ida ne’e primeira vez implementa iha Timor-Leste ne’ebé sei fo vantajen bo’ot ba Governu no komunidade sira, tanba reduz kustu sosa mina kada tinan liu Milaun $ 120 Dolar Amerikanu ne’ebé fornese ba sentral elétrika rua, alende ne’e sei kria kampu servisu ba komunidade sira, inklui kontribui hadiak ambiente”.

Tuir planu EDTL, E.P liu-husi apoiu KOIKA sei harii 1MW Solar painel no 2MWh BESS iha Munisípiu Ataúru ne’ebé sei hahú iha tempu badak.

Alende ne’e projetu Win Power ka enerjia anin iha Postu Administrativu Vemase ne’ebé poténsia bo’ot tuir rezultadu estudu ne’ebé halo ona iha área refere.

 

Média, EDTL, E.P