Maliana, 21 Abril 2023: Komisàriu Ezekutivu Servisu Tèkniku EDTL.E.P. Eng. Latino Jerónimo akompaña husi koordenador G-JPITV Sr. Natercio hamutuk ho Xefi Unidade Distribuisaun Munisípiu Bobonaro, Sr. Mario de Jesus, Sexta semana ne’e, hala’o enkontru ho funsionáriu EDTL, E.P Munisípiu no Postu sira iha Edifísiu EDTL, E.P Maliana.

Objetivu husi enkontru ne’e, atu rona orientasaun servisu husi nivél nasionál no atualiza progresu servisu EDTL, E.P nian iha Munisípiu Bobonaro, alende ne’e rona direta preokupasaun funsionáriu sira nian durante ne’e enfrenta iha terrenu.

Xefi Unidade Distribuisaun EDTL, E.P, Sr. Mario de Jesus aprezenta atinjimentu servisu ne’ebé EDTL, E.P Munisípiu Bobonaro iha hanesan implementasaun Projetu EletrifikasaunNasioná no Programa EletrifikasaunKomunitária iha Munisípiu Bobonaro durante ne’e. Maske nune’e EDTL, E.P Munisípiu Bobonaro sei enfreta difikuldade balu, liu-liu transporte hodi apoiu servisu tékniku nian, bainhira halo atendementu avarias.

Iha intervensaun Komisàriu Servisu Tèkniku EDTL, E.P Eng. Latino Jerónimo hatete, preokupasaun no dezafius hirak ne’e EDTL, E.P sei responde iha tempu besik, nune’e fasilita servisu ho lalais, kuailidade no seguru, tanba ne’e husu Xefi Divizaun Munisípiu Bobonaro submete pedidu ba EDTL, E.P nasionál, nune'e Konsellu Administrasaun diskuti hamutuk hodi aprova iha tempu besik.

Alende ne’e, Eng. Latino Jerónimo husu funsionáriu sira tenke kontribui no servisu hamutuk hodi halo kontrolu no manutensaun rutina ba instalasaun liña eletrisidade iha Munisípiu refere. Tanba projesaun EDTL, E.P nian bá koleta reseita iha tinan ne’e hamutuk 60 milhoes.

“Husu ba tékniku sira atu uza sasan ho kuidadu, responsabilidade no uza ekipamentu seguransa da vida (PPE) wainhira halo atende servisu iha terrenu. Aleinde tékniku sira kontinua superviziona implementasaun projetu PEN no PEK ne’ebé dadaun ne’e implementa iha munisípiu Bobonaro.

Munisípiu Bobonaro kompostu husi Postu Administrativu ne’en, inklui 50 suku, ne’ebé kuaze komunidade sira asesu ona liña eletrisidade, bazea ba dadus EDTL, E.P nian kliente utilizador enerjia elétrika kuaze rihun sanulu resin hitu.

Média, E.P