Bali, 28 Marsu 2023: Ekipa Eletricidade de Timor-leste, Empresa Pública (EDTL, E.P) ne’ebé lidera husi Vise Prezidente EDTL, E.P tersa-feira ne’e, hala’o enkontru ho General Manager PLN UID Bali, I Wayan Udayana, no jestor sira husi unidade Perusahaan Listrik Negara (PLN) Unit Induk Distribusi Bali.

Durante reuniaun ekipa PLN Unit Induk Distribusi Bali fahe experensia no aprezenta solusaun ba Sistema Elétrika liu-liu kualidade distribuisaun enerjia, maneira kontrolu enerjia ne’ebé lakon (Loses), atendimentu avarias no komersializasaun enerjia.

Iha abertura, Vise Prezidente EDTL, E.P Sr. Humberto Pereira hatete, reuniaun ida ne’e oportunu ba ekipa EDTL, E.P hodi hetan referensia no experensia balu husi PLN Bali ba melhoramentu Sistema elétrika iha Timor Leste, liu-liu kualidade distribuisaun, atendimentu avarias no jestaun enerjia (Loses).

“Ami husi EDTL, E.P agradese no apresia tebes ba disponibilidade husi PLN Bali nian, nune’e ohin realiza diskusaun ida ne’e, agradese mos ba esperensia no sugestaun balu ne’ebé hato’o konaba Sistema Elétrika”. hatete Diretór Distribuisaun Apoiu Konsumedor, Sr. Zil Nunes.

Alende ne’e, Diretór Planeamentu Sistema Eletrika, José Fernandes aprezenta informasaun balu konaba atijimentu EDTL, E.P nian, ne’ebé dadaun ne’e EDTL, E.P halo atendimentu ba 250 mil klientes iha territóriu, maibe dezafiu ne’ebé hasoru mak kualidade fornesimentu enerjia no loses ne’ebé bo’ot tebes (30 pursentu).

 

Média, EDTL, E.P