Aileu, 25 Maiu 2023: Eletricidade de Timor-Leste, Empresa Pùblica (EDTL, E.P), Liu-husi Komisàriu Ezekutivu Servisu Tèkniku, Eng. Latino Jerònimo Hamutuk ho ekipa ne'ebè akompanha husi Sekretàriu Administrador Sr. Felix Maria Oliveira no Diretòr Servisu Munisipal Registu Notariado no Servisu Kadastrais, Sr. Hermengildo Mendonca, Kuinta-feira ne'e, Hasoru malu ho komunidade sira iha Aldeia Kotbauro, Suku Seloi Malere, Muisìpiu Aileu, hodi koalia estatutu rai ne'ebè EDTL, E.P sei uza ba futuru konstrusaun Sub-Stasaun ho kapasidade Transformador 20 MVA.

Iha Sorumutuk ne'e, komunidade sira ne'ebè durante ne'e utiliza rai refere ho konsensia prontu oferse rai ho medida 6400 Metru Kuadradru gratuitamente ba EDTL, E.P hodi halo konstrusaun ba Sub-Stasaun, nune'e reforsa linha eletrisidade ne'ebè dadaun ne'e fornese husi Sub-Stasaun Camea.

"Ami koopera no prontu oferse rai ne'e hodi halo konstrusaun sub-stasaun ne'ebè EDTL, E.P sei halo iha futuru, rai ho medida 80 X 80 ne'e " Hatete Sr. Alexandre de Araujo.

Komisàriu Ezekutivu Servisu Tèkniku, Eng. Latino Jerònimo hatete Objetivu husi sorumutu ne'e atu husu apoiu autoridade lokal no komunidade nian hodi atribui rai ho medida 6400 M2 ba konstrusaun Sub-estasaun foun iha Seloi-Malere, nune'e assegura energia elétrika iha linha feeder 7 & Feeder 8 nian.

"EDTL, E.P apresia vontade Aman ho Inan sira iha àrea ne'e hodi atribui rai ne'ebè EDTL, E.P presiza tebes atu konstrui sub-stasaun ida iha Munisìpiu Aileu, maske vervalmente ita konkorda ona, maibe atu labele mosu reklasaun ruma iha futuru ita presiza deklarasaun konjunta por escrita, ne'ebè hetan rekonhesimentu husi Autoridade Lokal no Munisipal ho tìtulu atribuisaun liu-husi Ministèriu Justisa hafoin entrega ba EDTL, E.P."

Adjunto Administrador Munisípiu Aileu Sr. Felix Maria de Oliveira, apresia inisiativa EDTL, E.P bà Planu konstrusaun refere, tanba infrastrutura eletrisidade iha àrea ne'e sei kontribui tebes ba dezenvolvimentu bo'ot sira iha Munisìpiu ne'e.

Enkuantu Autoridade lokal koopera no servisu hamutuk ba implementasaun projetu Sub-estasaun iha Seloi-Malere no husu instituisaun relevante sira hamutuk ho komunidade aselera prosesu atribuisaun rai refere ba EDTL, E.P.

Mèdia EDTL.E.P.