Dìli, 29 Abril 2023: Enkontru Konsellu Administrasaun, Eletrisidade de Timor-Leste, Empresa Pública (EDTL, E.P), ne’ebé lidera husi Prezidente Konsellu Administrasaun EDTL, E.P Dr. Paulo da Silva, Sexta-Feira semana ne'e atualiza rasío eletrifikasaun iha Timor-Leste no avalia progresu implementasaun Programa Eletrifikasaun Komunitária (PEK), Projetu Eletrifikasaun Nasionál (PEN) ne’ebé durante implementa iha teritóriu nasionál, inklui atualiza progresu instalasaun Transformador 40 MVA iha Sub-stasaun Camea.

Iha enkontru refere Dr. Paulo da Silva, apresia servisu funsionáriu hotu nian, liu-liu tékniku sira ne’ebé durante ne’e involve direta iha implementasaun programa eletrifikasaun, instalasaun kontador pré-pagu no instalasaun transformador 40 MVA iha Sub-satasaun Camea.

Liu-husi implementasaun projetu eletrifikasaun nasionál EDTL, E.P konsege hasa’e rásio eletrifikasaun husi 85% ba 94% asesu eletrisidade, husi total projetu 126, projetu hirak ne’e 41 konklui ona no dadaun ne’e komunidade sira aseu ona eletrisidade. Enkuantu ba aldeia atus-rua sianulu resin ida (291 aldeias) EDTL, E.P aselera dala liña eletrisidade liu-husi implementasaun polítika eletrifikasaun komunitária no Solar Home Lighting System ba komunidade sira iha áreas remotas rejistadu hamutuk 1091 familias/uma. Ho pograma hirak ne’e tinan ne’e EDTL, E.P bele konklui ona 100% taxa kobertura asesu eletrisidade iha teritóriu nasionál. Hatete Xefi Departamentu PMU, Sr. Natercio dos Santos.

Sr. Paulino A. da Costa aprezenta progresu instalasaun kontador pré-pagu husi Outubru 2021 to’o Abril tinan ne’e hamutuk unidade 95,152. (Mono fasiku unidade 94,059, Trifasiku normal unidade 982, AMR Painel unidade 13, AMR CT unidade 20 no AMR DC unidade 78).

Enkuantu uma-kain ne’ebé seidauk instala kontador pré-pagu hamutuk unidade 14,615 husi númeru ne’e monofasiku hamutuk unidade 14,500 no trifasiku hamutuk unidade 115. Uma-kain hirak ne’e foin asesu enerjia elétrika liu-husi PEN-PEK iha tinan ne’e, tanba ne’e EDTL, E.P autoriza hodi uza enerjia eletrika durante fulan ne’en, hafoin tékniku sira sei halo instalasaun pré-pagu.

Média, EDTL, E.P