Díli, 31 Maiu 2023: Eletricidade de Timor-Leste, Empresa Pública (EDTL, E.P), Kuarta semana ne’e hala’o reuniaun ordináriu Konsellu Administrasaun hodi avalia implementasaun programa perioridade sira no servisu esensiais EDTL, E.P nian durante ne’e.

Iha reuniaun ne’e, Xefi Unidade Kontabilidade no Reseitas, Sr. Justino Mateus Martins, atualiza ezekusaun orsamentu tinan 2023 no reseitas ne’ebé rekollã iha periódu fulan Janeiro to’o fulan Maiu tinan ne’e.

Sr. Justino relata iha periódu Janeiro - Maio EDTL, E.P koleta ona reseitas ho montante Dólar Amerikanu Milliuan Sanulu resin ne’en liu ( $ 16.34 milhões ). Ho nune’e membru Konsellu Administrasaun nafatin enkoraza hodi servisu makas, hadiak kordenasaun ho kliente sira (Instituisaun Públiku no Privadu, Ministériu sira, nsst) ne’ebé iha dívida atu nune’e kumpri dever hodi halo pagamentu ba utilizasaun energia eletrika.

Aldende ne’e, Xefi PMU, Sr. Natércio, apresenta mos progresu implementasaun obra husi Projetu Eletrifikasaun Nasionál no Programa Eletrifikasaun Komunitária. Durante apresentasaun, Sr. Natércio relata kompaña balu iha nia progresu implementasaun obra ki’ik tebes, tanba kauza husi situasaun jeográfika difikulta mobilizasaun material konstrusaun ba lokál projetu. Maske nune’e obra sira ne’e lao ho diak no kualidade tuir standarte EDTL, E.P nian.

Enkuantu Diretor Departamento Distribuisaun no Apoiu Konsumidor, Sr. Zil Nunes atualiza informasaun konaba progresu instalasaun kontador pré-pagu husi priódu fulan outubro 2021 to’o Maiu tinan ne’e, EDTL, E.P konsegue instala kontador pré-pagu unidade rihun sianulu resin (95.152 Unidades instaladu iha uma klientes), maske nune’e kuaze uma-kain rihun sanulu resin hat liu (14615 uma-kain) iha teritóriu nasionál mak sedauk instala.

Ikus liu, Sra. Fatima Abdad apresenta esbosu politika rekrutamentu, treinamento indusaun no kode konduta ba membru Konsellu Administrasaun. Ho nune’e Membru Konsellu Administrasaun nafatin enkoraza hodi servisu makas tau matan ba obra hirak ne’ebé dadaun ne’e ezekusaun lao hela, nune’e bele garante kualidade obra hirak ne’e.

Média, EDTL, E.P