Díli, 17 Agostu 2023: Eletricidade de Timor-Leste, Empresa Pública (EDTL, E.P), Prezidente Komisaun Ezekutiva, Dr. Paulo da Silva akompaña, S.E Ministru Obras Públikas, Dr. Samuel Marçal ho S.E Sekretáriu Estadu Eletrisidade, Be’e no Saneamentu, Sr. Santos Noronha, halo diskusaun badak ho tékniku sira hodi koalia kona-ba serbisu operasionál sira inklui atendimentu klientes, iha edifísiu EDTL, E.P, Kaikoli-Díli kinta semana ne’e.

S.E Ministru Obras Públikas Dr. Samuel Marçal husu tékniku sira serbisu ho responsabilidade no onestu bainhira halo antendimentu ba kleinte sira iha terrenu, tanba EDTL, E.P hanesan fonte reseitas estadu nian, tanba ne’e funsionáriu hotu nafatin serbisu ekipa no profesional, hodi garante funsionamentu instituisaun no fornesimentu enerjia elétrika ba konsumedor sira.

Iha oportunidade ne’e, funsionáriu públiku sira hato’o preokupasaun konaba tempu lisensa sem vensimentu ne’ebé sei termina iha tinan 2023. Membru governu ne’e hatete, antes ne’e ajente administrasaun estadu tenki obedese ba lei funsaun públika, tanba ne’e tenki deside tuir itabo’ot sira konsiensia rasik.

“Karik itabo’ot sira hakarak servisu nafatin iha EDTL, E.P entaun tenke rezigna-an husi funsaun públika no selebra kontratu foun ho EDTL, E.P. Maske nune’e, Kontratu rua ne’e laiha diferente, maibe depende ba prestasaun serbisu diak, pontuál, responsabilidade, no obidénsia, xefi ida sei lahapara itabo’ot sira.

Total Funsionáriu Públiku ne’ebé dadaun ne’e hala’o serbisu iha Eletricidade de Timor-Leste, Empresa Pública ne’ebé mai husi MoP hamutuk 449 pesoas.

***