Covalima, 10 Outubru 2023: Eletricidade de Timor-Leste, Empresa Pública, (EDTL, E.P) liu-husi Komisáriu Ezekutivu Serbisu Korporativu, Júlio Gonçalves hamutuk ho Vise-ministru Infraestrutura, Júlio do Carmo akompaña husi Sekretáriu Estadu Eletrisidade, Be’e no Saneamentu, Santos Noronha, inklui Autoridade Lokál, tersa semana ne’e ofisiálmente halakan eletrisidade ba komunidade iha Suku Nanuú, Be’e Lulik-Leten no Fatumea, liu-husi implementasaun Projetu Eletrifikasaun Nasionál (PEN), pakote 13.

Iha intervensaun Komisáriu Ezekutivu Serbisu Korporativu, Júlio Gonçalves informa, komunidade sira tenke utiliza enerjia elétrika ho kuidadu, seguru no responsabilidade.

“Aman-Inan sira hotu tenke uza enerjia elétrika ho seguru, labele koko halo ligasaun mesak tanba enerjia eletrika ne’e perigu nune’e labele afeta vida, bainhira presiza halo ligasaun ka instalasaun ruma favor kontaktu responsavél EDTL, E.P iha munisípiu hodi ajuda imi”.

Alende ne’e, apela ba komunidade sira hodi uza eletrisidade gratuitamente durante fulan ne’en, hafoin ne’e tékniku sira sei halo instalasaun kontador pré-pagu hodi kontribui ba taxa eletrisidade.

Sekretáriu Estadu Eletrisidade, Be’e no Saneamentu, Santos Noronha agradese no apresia kontribuisaun autoridade lokál no komunidade sira nian, kolabora no apoiu maka’as durante prosesu konstrusaun projetu eletrifikasaun iha área ne’e.

“Husu ita hotu tenke uja eletrisidade ho didiak no kuidadu no asegura fatin aparelu elétriku ne’ebé instala iha área ne’e, nune’e bele utiliza ba tempu naruk”.

Vise-ministru Infraestruturas, Júlio do carmo hato'o parabéns bá komunidade suku tolu ne'ebé assesu ona eletrisidade, Tékniku PMU sira ne’ebé superviziona projetru refere to’o remata, inklui kompaña implentador.

Governante ne’e, husu tékniku EDTL, E.P nafatin serbisu hamutuk ho autoridade lokál hodi kontrola obra refere, no evita komunidade sira atu halo ligasaun illegal.

Implementasaun Projetu Eletrifikasaun Nasionál (PEN) pakote 13 iha Suku Nanuú, Be’e Lulik-Leten no Fatumea, Postu administrativu Fatumea, ho distânsia liña media tensaun (MT) 10 kilómetru sirkuitu (Kms), baixa tensaun (BT) 19 kilómetru sirkuitu (Kms) inklui instalasaun transformador hamutuk unidade tolu (3), no benifisia uma-kain 407 asesu eletrisidade.

Projetu refere implementa husi Kompaña Royal Rest Unip. Lda JV Delta Dini Unip. Lda ho kontratu $657, 805.69 ho durasaun fulan ne’en (6).

Média, EDTL, E.P