Díli, 14/12/2023: Komisáriu Ezekutivu Serbisu Korporativu, Eletricidade de Timor-Leste, Empresa Pública (EDTL, E.P) Júlio de Jesus Goçaves, kinta-feira ne’e, hala’o enkontru ho Ministériu Obras Públikas, Sekretario Estadu bá Asuntu Toponómia no Organizasaun Urbana, Autoridade Reguladores Telekomunikasoens, Autoridade Munisipál, TIC Timor inklui Operadores Telekomunisoen nasionais (Timor Telecom, Telkomsel no Telemor), Metrolink, Sacomtel, Global Net, Ralph Vision, PNTL (CCTV), PNDS, hodi atualiza informasaun no diskuti arendamentu aluga poste eletrisidade ne’ebé dada kabu fibra óptika.

 

Iha reuniaun refere EDTL, E.P fó ultimatu to’o loron 25 fulan ne’e, atu operdores telekomunikasoens idak-idak halo identifikasaun no melloramentu ba instalasaun kabu fibra óptika iha poste eletrisidade ne’ebé des-organizadu iha Sidade Díli inklui kapitál munisípiu sira tuir estandarte ne’ebé estipula ona iha kontratu.

 

Ba operador telekomunikasaun sira ne’ebé la kumpri kondisoens hirak ne’e, EDTL, E.P sei aplika sansaun hodi desliga ka tesi-kotu kabu hirak ne’ebé des-organizadu, ikus sei hapara kontratu aluga poste eletrisidade.

 

Asaun hirak ne’e EDTL, E.P halo bazea ba orientasaun Governu nian, inklui preokupasaun públiku durante ne’e kona-ba kabu hirak ne’ebé dada iha poste eletrisidade nian ho kondisaun tabele no monu iha trotoar-leten.

 

Média, EDTL, E.P