Liquiça, 06 Dezembru 2023: Eletricidade de Timor-Leste, Empresa Pública (EDTL, E.P) liu-husi komisaun ezekutiva akompaña Ministru Obras Públikas, Samuel Marçal ho Secretáriu Estadu Eletrisidade, Be’e no Saneamentu, Santos Noronha, halo lansamentu primeira pedra ba projetu dezeñu, fornesimentu, konstrusaun sivil, instalasaun transformador ho kapasidade 20 MegaVolt Ampere (MVA), iha sub-stasaun Liquiça, kuarta-feira ne’e.

Iha intervensaun Ministru Obras Públikas, Samuel Marçal hatete, atu resolve preokupasaun kliente sira nian konaba enerjia, maka iha tinan ne’e, Governu liu-husi EDTL, E.P sei aselera projetu konstrusaun sub-stasaun foun inklui projetu dizitalizasaun sistema, nune’e bele fasilita tékniku sira halo intervensaun ho lalais bainhira akontese avarias.

Além de ne’e, Secretáriu Estadu Eletrisidade, Be’e no Saneamentu, Santos Noronha hatete, projetu instalasaun transformador foun ne’e importante hodi hodi antisipa demanda ba enerjia ne’ebé aumenta. Tanba ne’e, membru governu ne’e husu kompaña atu implementa projetu refere ho kualidade tuir espesifikasaun no durasaun tempu bazea ba kontratu.

Tuir planu transformador foun sei atende espesialmente nesesidade Timor Port nian, sei fornese enerjia liu-husi feeder espesial rua ( Feeder 3 no Feeder 5).

Enkuantu transformador 20MVA existente ne’ebé durante ne’e fornese enerjia ba públiku inklui Timor Port, EDTL, E.P sei halo mudansa karga husi transformador refere hodi fornese enerjia electrica ba deit kliente Públiku (kliente doméstiku, komersial, Governu no agência Internacional sira).

Projetu dezeñu, fornesimentu, konstrusaun sivil, instalasaun transformador ho kapasidade 20 MegaVolt Ampere (MVA) refere implementa husi kompaña TBEA ho durasaun tempu fulan ne’en.

Média, EDTL, E.P