Betano, 27 fevereiru 2024: Eletricidade de Timor-Leste, Empresa Pública (EDTL, E.P) liu-husi Komisáriu Ezekutivu Serbisu Korporativu, Júlio de Jesus Gonçalves, akompaña husi Xefi Divizaun Rekursu Umanu, Fátima Abdad ofisiálmente loke formasaun ba funsionáriu sira, kona-ba polítika seguransa no saúde iha serbisu fatin (Occupational Health and Safety Engineer/Consultant), ne’ebé hala’o iha Sentrál Elétrika Betano, Segunda-feira ne’e.

Iha intervensaun Júlio de Jesus Gonçalves hatete, formasaun ne’e importante atu bele aumenta koñesimentu pesoal nune’e aplika iha serbisu fatin, tanba ne’e husu formante sira atu aproveita no ativu iha diskusaun ho formadores.

Alende ne’e, komisáriu ne’e mos husu funsionáriu sira atu serbisu ho professional no unidade hodi serví kliente sira.

Matéria hirak ne’ebé aprezenta husi formador Aloysius Lesto Kusumo, Occupational Health and Safety Engineer/Consultant, asistente Theodorus Yoga hamutuk ho ekipa formador tékniku EDTL, E.P nain 6 husi departamentu, Produsaun, Transmisaun no Distribuisaun.

Formasaun ne'e halaʾo durante loron rua, hafoin ne'e sei kontinua ba Tékniku sira iha munisípiu Liquiça, Ermera no Bobonaro.

Media, EDTL, E.P