Díli, 30 Outubru 2024: Prezidente Komisaun Ezekutiva, Eletricidade de Timor-Leste, Empresa Pública (EDTL, E.P), Dr. Paulo da silva, akompaña husi Komisáriu Ezekutivu Serbisu Korporativu, Júlio de Jesus Gonçalves, no Komisáriu Ezekutivu Serbisu Tékniku, Eng. Latino Jerónimo, hala’o enkontru ho Diretór sira no Xefi unidade Munisípiu sira, iha salaun enkontru EDTL, E.P Kaikoli-Díli, kuarta-Feira ne’e.

Objetivu husi enkontru ne’e, atu fo orientasaun serbisu ba jerente sira husi nasionál no munisipal inklui introduz Sr. Roberto Manuel Marçal hanesan Komisáriu Ezekutivu Serbisu Tékniku foun ne’ebé nomeadu bazeia ba despacho ministerial ba periódu tinan ha’at.

Iha ámbito neé Eng. Latino Jerónimo mós hato’o agradese wa’in ba apoiu tomak no servisu hamutuk durante mandatu tinan 4 nia laran, no husu atu kontinua nafatin apoia lideransa foun hodi nuneʾe garante nafatin funsionamentu enerjia elétrika bá konsumidor sira.

Iha oportunidade neʾe Eng. Roberto Manuel Marçal sei halaʾo nia knaar hansan CEST iha loron 01 Novembru 2024 bazea ba despacho Ministro das Obras Públicas. Eng. Roberto apela atu hotu-hotu kontinua servisu hamutuk nafatin,no nia informa tan katak sei laiha muda ba sistema funsionamentu neʾebé iha, nia mai atu kontinua programa sira neʾebé iha ona, no husu atu kontiniua servisu hamutuk hodi halo dezenvolvimentu makina empresa nian.

Iha tempu hanesan, lori estrutura tomak nian naran, Dr. Paulo da Silva apresia no agradese waʾin ba Eng. Latino Jerónimo ba ninian kontribuisaun durante nia lideransa hodi kontribui susessu hotu. Indikador ba susesu sira mak hanesan hasae eletrifikasaun nasional, reseitas, no kontratu sira hotu neʾebé hetan vistu husi tribunal das contas. Nuneʾe ami deseja ba ita kontinua susesu iha fatin foun, kontinua kontribui nafatin ita nia matenek hodi dezenvolve Rai doben Timor-Leste.

Alem de neé Dr. Paulo mós hatoʾo bemvindu ba Eng. Roberto Manuel Marçal husu atu hotu-hotu apoiu lideransa foun neʾe hodi nuneʾe ita bele atinje metas empresa nian.

Média EDTL, E.P.