Díli, 09 Janeiru 2025: Governu Timor-Leste liu-husi Sua Exelénsia, Primeiru Ministru, Kay Rala Xanana Gusmão, akompaña husi membru governu no diplomata sira inklui jerente EDTL, E.P, ofisialmente halo lansamentu konstrusaun sub-stasaun komoro no redi transmissaun 150 kilovolt (kV), iha sub-stasaun komoro, kinta-feira ne’e.

Objetivu esensial konstrui sub-stasaun ne’e hodi ajuda halo balansu distribuisaun enerjia elétrika iha Sidade Díli liu-liu iha parte oeste, sub-stasaun ne’e mós sai hanesan alternativa hodi asegura fornesimentu enerjia bainhira halo manutensaun ka akontese avaria iha sub-stasaun Camea.

Projetu konstrusaun no instalasaun sub-stasaun kompostu husi transformador unidade tolu ho kapasidade 120 MVA, ho nia asesória sira inklui Sistema SCADA. Alende ne’e rede transmisaun 150 kV ho distánsia kuaze kilómetru lima, double ciscuit.

Implementasaun projetu ne’e baze ba estudu viabilidade ne’ebé halo ona durante tinan ida resin husi kompaña Consultant PT. Amythas JV ho PT. Hexa Integra Electrica no Caiulu Unip, Lda.

Projetu ne’e durasaun kontratru fulan 15 ho montante orsamentu miliaun 22 resin, no implementa husi kompaña internasional TBEA.

Média, EDTL, E.P