Dili, 22 Julho 2025| Eletricidade de Timor-Leste, Empresa Pública (EDTL, E.P), tersa-feira ne’e, selebra tinan 5 existência iha mesmu tempu marka istória foun ba dezenvolvimentu setór eletiricidade Iha Timor-Leste tanba EDTL, E.P asina ona akordu Power Purchase Agreement (PPA) Solar Energy no Battery Energy Storage System (BESS) ho konsórsiu EDF, ITOCHU I-Enviroment, ne’ebé sei implementa iha Laleia-Manatuto, além de halo Lançamento Plataforma transaksaun energia online hamutuk ho parseiru EDTL nian ETO, BNCTL, Telkomcel no Telemor. 

Iha Diskursu, Vice-Primeiro Ministro, Ministro Coordenador dos Assuntos Sociais, no Primeiru-Ministru Interinu, Eng. Mariano ASSANAMI Sabino, agradese ba funsionariu EDTL hotu-hotu ne’ebe dedika an tomak hodi servisu ho fuan oinsa garantia ahi labele mate.

Timor-Leste iha enerjia barak hanesan anin, bee no loron matan ne’ebe presiza utiliza ho masimu atu labele estraga ita nia ambiente no illa kiik ida ne’e, entaun presiza jere atu bele sustentável di’ak ba ita no jerasaun tuir mai.

Bainhira atu dezenvolve enerjia solar ne’e pasu pozitivu ida, tanba ne’e lori Maun Boot Kay Rala Xanana Gusmão nia naran hato’o parabens ba imi hotu tanba ho imi nia dedikasaun maiske dalaruma ahi mate ema trata hasai lia mal maibe ho apoiu familia tomak nia kontinua pasesia hodi halo servisu ho di’ak.

Ministru Obras Públikas, Samuel Marçal hatete, akordu ne'ebé assina kona-ba projetu Solar PV sei fó benefísiu boot ba Timor-Leste. Projetu ida ne’e sei kontribui ba dezenvolvimentu sustentável, proteksaun ambiente, mebru governu ne’e mos kompania sira atu perioritiza involvimentu rekursu Timor oan sira iha implementasaun projetu refere.

Além de ne’e, Presidente Komisaun Executiva, Dr. Paulo da Silva hatete, honra boot ida ba EDTL, simu suporta tomak no ohin hamutuk ho ita boot sira hotu hodi asiste atinjimento hirak ne’e no selebra aniversario EDTL nian ba dala 5. Ami kontinua sura ho ita boot sira nia apoiu no suporta tomak hodi lori EDTL sai forte no diak liu tan iha futuro, hodi bele hala’o misaun Lori Naroman ba Público no nasaun Timor Leste.

Husi esforsu koletivo sira, serbisu makas, dedikasaun, kreatividade EDTL, E.P konsege ultrapasa dezafius sira no atinji rezultadu serviçu diak balun ne’ebé signifikante tebes.

• EDTL, E.P konklui rásio eletrifikasaun a nivel suco 100% liu husi projetu eletrifikasaun naiconal liu 140 pakotes, maske nunee sei falta 136 aldeia neebe presisa halo instalasaun eletricidade iha tinan ida nee no tinan oin
• Halo instalasaun liu 150,000 kontadores pre-pago iha Timor laran tomak desde 2021, halo mos melhoramento ba rede distribuisaun tantu iha capital no municipios; ida nee fo ba ita rezultado iha kresimento receitas husi tinan ba tinan. Iha 2021: $34M, 2022: $48M, 2023: $54M no iha 2024: $58M, ita nia expectative ba tinan ida nee sei kolekta $65M.
• Konklui estudu viabilidade solar PV no halo konkurso público hodi hari planta SPV iha Laleia Manatuto ho kapasidade entre 72MW -85MW neebe ohin ita asina 25 anos akordu PPA ho consorsium EDF-ITOCHU.
• Upgrade sub stasaun sira hanesan Camea husi 63MVA ba 103MVA, Liquiça husi 20MVA aumenta ba 40MVA no agora dadaun halo hela konstrusaun ba sub stasaun foun iha Comoro ho kapasidade 120MVA, no sei konklui iha tinan ida nee nia rohan.
• Implementa programa eletrifikasaun komunitariu no programa energia rural, hamutuk liu 60 pakotes no halo instalasaun iluminasaun publica iha capital Municipio sira no postu administrativo sira iha Timor Laran tomak.
• Hamutuk ho IFC, EDTL, E.P konklui ona estudu pre-viablidade ba energia oelica/anin no tinan ida nee too tinan oin halo estudu viabilidade para hare se teknikamente viavel entao bele hari planta ho kapasidade 50-100MW iha Oleo no Lariguto iha tinan sira mai oin.
• Konklui tiha estudu viablidade ba konversaun geradores sira husi diesel ba gas.

Iha biban ne’e, Presidente Komisaun Executiva, Dr. Paulo da Silva hamutuk ho Ministru Obras Públikas, Samuel Marçal inklui Ministra Finansas, Santina José Rodrigues F. Viegas Cardoso fahe mos sertifikado apresiasaun ba Departamentu hotu iha EDTL, E.P.

Média, EDTL, E.P