Díli, 06 Novembru 2025 : Prezidente Komisaun Ezekutiva Eletricidade de Timor-Leste, Empresa Pública (EDTL,E.P.) Dr. Paulo da Silva, akompaña husi Ofisiál Programa Planeamentu hala’o debrief ho International Finance Corporation (husi IFC-World Bank Group Timor-Leste) sr. David Fredman, sra Leila no kompaña 3E atualiza rezultadu vizita téknika ba futuru fatin projetu Enerjia Eòlika no Sistema Armazenamentu enerjia Bateria (BESS) iha Lariguto Ossu No Oeleo ba EDTL,E.P., iha sala reuniaun IFC Lesidere.

Hafoin halo vizita téknika, Ekipa IFC no kompaña 3E informa katak fatin sira ne’ebé propoin ba met mast iha fatin rua mak finaliza ona mak hanesan Larigutu Ossu – Vikeke no Oeleo- Bobonaro no tau ona koordenada sira hodi nuneʾe bele hahú halo prosesu ne’ebé relatadu ho asesu rai no lisensa sira ne’ebé presiza no sira relata tan katak iha planu inisiál atu instala met mast ho altura 120 metru, maibé depois vizita ténika no avaliasaun, propoin atu muda ba met mast 100 metru de’it. Desizaun ida ne’e konsidera asuntu lojístika transporte no mos kondisaun terrenu iha fatin ne’ebé limitadu iha área (footprint). Met mast 100 metru mak seidauk kompromete flexibilidade ba dezenñu turbina no leiaut ba fazenda anin ne’e.

Iha tempu hanesan Prezidente Komisaun Ezekutiva Dr. Paulo da Silva hateten kona-ba instala met mast ho altura 120 metru atu muda ba met mast 100 metru, ami la iha objeisaun,100 metru ne’e konsidera teknikamente aketável. Koleksaun dadus iha altura referidu ne’e bele kontínua, no ami konsidera apropriadu atu utiliza dadus sira ne’e ba finalidade finál no ikus apresia ho diskusaun no aprezentasaun sira nee hotu.