Díli, 07 Novembro 2025 – Komisaun Ezekutiva, Eletricidade de Timor-Leste, Empresa Pública (EDTL, E.P), liu-husi Komisáriu Ezekutivu Serbisu Tékniku, Eng. Roberto Manuel Marçal hamutuk ho Komisáriu Ezekutivu Serbisu Korporativu, Júlio de Jesus Gonçalves, ekipa Rekursu Humanu inklui formador sira, sexta-feira ne’e, ensera ona periódu treinamentu konaba Occupational Health and Safety (OHS) ba assistente tékniku rekrutadu hamutuk hatnulu resin hat, iha sala formasaun EDTL-E.P, Kaikoli-Díli.

Iha intervensaun Komisáriu Ezekutivu Serbisu Tékniku, Eng. Roberto Manuel Marçal husu atu serbisu ekipa, fo perioridade ba seguransa vida, liu-liu sei la tolera tékniku sira mak fasilita halo koneksaun illegal.

Alende ne’e, Komisáriu Ezekutivu Serbisu Korporativu, Júlio de Jesus Gonçalves hatete, assistente hirak ne'e sei deskoloka ba Postu Administrativu idak-idak hodi apoiu serbisu atendimentu kliente.

Hafoin remata formasaun refere, asistente tekniku hirak ne’e iha segunda-feira sei kontinua on job training durante fulan tolu iha Díli, hafoin destaca ba Postu Administrativu sira.