Díli, 03 dezembru 2025 Membru Konsellu Administrasaun EDTL, E.P. hala’o enkontru ordináriu ne’ebe preside husi Presidente CA Dr. Marito Ferreira, iha salão enkontru EDTL, E.P., tersa-feira semana ne’e.

Iha enkontru ordináriu ida ne’e Komisaun Ezekutiva, liu husi Diretór sira atualiza progresu servisu hanesan: rekrutamentu ba funsionáriu; konsumu mina ba sentrál elétrika Hera, Betano no Ataúro; melloramentu liña distribuisaun, implementasaun projetu kabu subterranu no iluminasaun públika; inklui progresu subestasaun Komoro no liña transmisaun.

Ba rekrutamentu iha tinan ida ne’e, departamentu Rekursu Umanu halo ona rekrutamentu ba 196 pessoal (maioria funsionáriu tékniku) atu reforsa serbisu distribuisaun no atendimentu ba kliente sira iha postu iha kada munisípiu. No dadaun ne’e, ekipa analiza forsa traballu hala’o hela exersísiu atu analiza mapeamentu pessoal empresa nian hodi garante iha rekursu nesesáriu, ho abilidade hodi bele atinje objetivu estratéjiku empreza nian.

Relasiona ho projetu konstrusaun ba substasaun foun iha Komoro nomos rede transmisaun, dadaun ne’e progressu fiziku atinji ona 76% no 77%, respetivamente. Haktuir planu obra refere se termina iha trimestre dahuluk iha tinan 2026. Progressu serbisu husi projetu pilotu kabu subterranu, dadaun ne’e ekipa sira enfrenta hela difikuldade tamba konstrusaun sivil ba obra refere lao lentu, ho nune’e prejudika atu aselera instalasaun kabu subterranu ne’e rasik.

Alende ne’e, Diretór Distribuisaun Apoiu Konsumidor, Eng. Zil Nunes Pinto, relata mós progresu husi melloramentu liña distribuisaun iha kapital Díli, ne’ebe finansia husi Fundu Infraestrutura (FI), atinje ona 45%. Iha biban ne’e mos, Diretor relata katak Feeder 7 no 8 mak ninian frekuensia trip makas no futuru implementasaun substasaun iha Aileu se bele resolve ida ne’e.

Média EDTL, E.P.