Díli, 13 Janeiru 2026| Membru Konsellu Administrasaun EDTL, E.P. partisipa enkontru extraordináriu ne’ebé prezide husi Prezidente Konsellu Administrasaun, Dr. Marito Ferreira, iha sala reuniaun EDTL, E.P., segunda-feira ne’e.

Enkontru extraordináriu ida ne’e, Prezidente Komisaun Ezekutiva, Dr. Paulo da Silva, aprezenta planu, programa no orsamentu ba tinan 2026. Iha tinan ida ne’e, nafatin fó prioridade ba melloramentu servisu eletrisidade liu husi implementasaun projetu kabu subterranu, rehabilitasaun liña distribuisaun, no konstrusaun substasaun sira.

EDTL, E.P. mos kontinua servisu ba diversifikasaun fonte enerjia, inklui konstrusaun planta solar PV no sistema Baterry Energy Storage System (BESS) iha Laleia, no konstrui mos iha Ataúro, hodi garante fornesimentu enerjia elétrika 24 oras. Alénde neʾe kontinua hala’o estudu viabilidade ba dezenvolvimentu enerjia eólika iha lokal potensial rua, mak hanesan Oéleo-Bobonaro no Lariguto-Vikeke .

Iha setór eletrifikasaun, programa eletrifikasaun a nivel aldeia sei finaliza, no paralelamente hasae reseita liu husi instalasaun kontador, melloramentu prestasaun servisu ba kliente no entidade seluk, implementasaun sanksaun, realizasaun leilão, no depozita osan iha banku. No kontinua halo reforsa ba kapasidade institusionál, mellora fasilidade sira, no reforsa ekipamentu, hodi garante seguransa no kualidade servisu eletrisidade.

Iha biban ne’e, Prezidente Komisaun Ezekutiva mos aprezenta dadus reseita ne’ebé rekolla durante fulan Janeiru to’o Dezembru 2025, ho total montante USD 69.044.000.

Média EDTL, E.P.