Uatucarbau, 23 Janeiru 2026| Prezidente Komisaun Ezekutiva, Dr Paulo da Silva, akompaña husi Komisáriu Ezekutivu Serbisu Tékniku, Eng. Roberto Manuel Marçal, Diretór sira inklui Xefi Unidade Munisípiu Viqueque, sexta-feira ne’e hala’o enkontru ho Autoridade Postu Administrativu Uatucarbau hodi koalia konaba dezenvolvimentu setór eletrisidade iha postu refere.

Durante enkontru Prezidente Komisaun Ezekutiva, Dr. Paulo da Silva aprezenta problema avarias ne'ebé akontese durante ne'e tanba kauza husi distánsia liña distribuisaun enerjia elétrika do'ok, husi sub-stasaun Viqueque distribui ba Postu Administrativu Uatucarbau ho distánsia kuaze 86 kilómetru sirkuitu, Postu Baguia distribui husi sub-stasaun Baucau ho distánsia kuaze kilómetro sirkuitu 60 resin no Iliomar hetan distribuisaun husi sub-stasaun Lautem ho distánsia kuaze kilómetru sirkuitu 60 resin, nune’e afeita ba kualidade fornesimentu enerjia ba komunidade sira iha postu hirak ne’e.

Tanba ne’e, EDTL-E.P Planu ona atu konstrui tan sub-stasaun ida ho kapasidade transformador 20 MVA iha Uatucarbau hodi kobre fornesimentu enerjia elétrika iha área mensionadu. Alende ne’e sei instala feeder espesial ida iha Kapitál Postu Administrativu Uatucarbau nune’e bele asegura akontese avarias.

Adminisrador Postu Administrativu Uatucarbau, Anacleto Doutel Sarmentu agradese ba inisiativa EDTL, E.P nian atu hadiak kualidade fornesimentu enerjia elétrika ba komunidade sira. Autoridade nemós hato’o prontidaun atu kontribui no asegura prosesu implementasaun projetu ne’e to'o remata.

Iha biban ne’e, Komisaun Ezekutiva hamutuk ho Autoridade Postu Administrativu Uatucarbau akompaña husi tékniku sira vizita kedas rai ne'ebé identifika ona atu halo konstrusaun no instalasaun sub-stasaun refere.

Média, EDTL-E.P