Díli, 21 Janeiru 2026 – Eletricidade de Timor-Leste, Empresa Pública (EDTL, E.P), iha loron kuarta-feira ne’e hala’o workshop estratéjiku kona-ba estabelece klaridade papel no responsabilidade, identifika inefisiénsia, desafiu no solusaun ba dezenvolvimentu, ne’ebé realiza iha Maubara Room, Timor Plaza.

Objetivu husi workshop ne’e atu reorganiza planu no força-trabalhu empresa nian, hodi sai hanesan guião atu implementa, nune’e bele maximiza performánsia servisu no kontribui ba rezultadu implementasaun planu asaun anual ne’ebé trasa ona.

Iha serimónia abertura, Prezidente Komisaun Ezekutiva EDTL, E.P, Dr. Paulo da Silva, hatete katak atividade ida ne’e importante teb-tebes atu fasilita prosesu identifikasaun inefisiénsia no desafiu iha servisu durante ne’e, hodi buka solusaun ne’ebé diak no kontribui ba implementasaun planu asaun anual ne’ebé trasa ona.

Dr. Paulo da Silva mos husu atu partisipante hotu-hotu foka no kontribui maksimu, nune’e Departamentu no Seksaun sira bele halo kontribuisaun ida-idak hodi kompilasaun ideia sira iha grupu kada ida.

Workshop ne’e hala’o durante loron-tomak no hetan partisipasaun husi Komisaun Ezekutiva, Diretór sira, Xefe Departamentu no Xefe Seksaun sira.

Mídia, EDTL, E.P