Díli, 19 Fevereiru 2025|Prezidente Komisaun Ezekutiva EDTL, E.P., Dr. Paulo da Silva, akompaña husi Komisáriu Ezekutivu Servisu Tékniku, Eng. Roberto Manuel Marçal, Diretór DRDAC Sr. Zil Nunes, Diretór Transmisaun Eng. Egídio, Diretóra Rekursu Umanu Sra. Fátima Abdad no Kordenadór Formasaun Eng. Seguismundo, halo enseramentu ba formasaun “Hotline Maintenance” ba asistente tékniku sira ne’ebé apoiu husi Konsultór Tenaga Nasional Berhad (TNB) Malázia/Volta Forensic, durante loron tolu iha edifísiu EDTL, E.P Kaikoli-Díli.

Prezidente Komisaun Ezekutiva, Dr. Paulo da Silva, hato’o agradese ba Sr. Darma no Raffiq ne’ebé fó tempu atu partisipa iha treinamentu importante ida ne'e, no husu formante sira atu aplika iha servisu koñesementu ne’ebé sira hetan durante formasaun. PCE mós akresenta, tékniku sira tenke iha disponibilidade atu aprende tan hodi sai espesialista iha área idak-idak nian.

Iha oportunidade ne’e, Sr. Raffiq husi Tenaga Nasional/Volta Forensic apresia no agradese ba EDTL, E.P. ba konfiansa no oportunidade atu fó formasaun ba funsionáriu sira. Formasaun ida ne’e sei ajuda hasa’e kapasidade tékniku sira atu fó atendimentu ne’ebé di’ak liu ba públiku no espera katak koperasaun sei kontinua iha futuru.

Partisipa iha formasaun ne’e hamutuk tékniku 20 pesoas.

Média EDTL, E.P.